El rumberu Melendi sintonía de la Vuelta a España

L'uvieín Melendi va poner la sintonía de la 59ª Edición de Vuelta a España, el tema escoyíu ye "Con la luna llena", sigún adelantó ayeri Unipublic, la empresa organizadora de la carrera.

La escoyeta del tema que sirve de banda sonora a la prueba ciclista siempre ye noticia. Munchos de los cantares escoyíos pola Vuelta convertiéronse en soniquetes que tol mundu canturreaba, como escaecer "Me estoy volviendo loco" de "Azul y Negro", "Conga" de "Miami Sound Machine" o "Más y más" de "La Unión", o "Pedaleando" de Serafín Zubiri. De les ventiséis sintoníes que tuvo la vuelta hasta la fecha trés ficiérenles asturianos, dos del gaiteru Hevia, "Tirador" y "Garrotín", y una Tino Casal "Pánico en el edén". D'un tiempu a esta parte les sintoníes de la Vuelta yá nun tienen la repercusión que teníen enantes, pero siguen siendo una bona rampla de llanzamientu pa munchos artistes.

Agora toca-y el turnu a Melendi, que nel últimu añu algamó unes bones cifres de ventes col so estilu tan paecíu a los catalanes "Estopa". Una bona campaña de promoción y el preste del públicu adolescente na so mayoría, llevólu a sonar peles radioformules y a dar abondos conciertos per tol Estáu Español. N'Asturies garró fama col tema "Asturias", que con un repás na lletra a los tipismos asturianos, enganchó a munchos como si fuere un himnu rumberu asturianu.

Pa estos díes ta preparada la grabación d'un videu promocional de la Vuelta. Esti videu va grabáse en Lleón, llugar onde va echar andar la vuelta, y nél van apaezer Melendi y el ciclista Abraham Olano.