El robu del sieglu

A les 9.30 d'esta mañana, el xulgáu d'Instrucción númberu 2 d'Uviéu foi l'escenariu pa ún de los pleitos más surrealistes de los munchos que dacuando enfrenten a l'alministración colos sindicatos. Ello ye que trés sindicalistes de la Federación de Sanidá de Comisiones Obreres y otros dos del Sindicatu d'Auxiliares d'Enfermería teníen que responder énte'l xuez d'una demanda por robu que punxo la Conseyería de Sanidá del Principáu. Los fechos vienen del 23 de febreru del 2.003, cuando los sindicalistes se trancáron nel despachu del Conseyeru de Sanidá nel trescursu de les reivindicaciones pola igualación salarial del personal del Sespa col d'otres comunidaes autónomes. N'acabando l'encierru, los titulares del despachu echaron a faltar dellos elementos, lo que-yos llevó a poner una denuncia por robu contra los representantes. Nun se sabe en cuanto ta peritao'l valor de los elementos que supuestamente arramplaron los sindicalistes, pero nun ye mui difícil sacar la cuenta: una pluma estilográfica, un paquete de carambelos y dos insignies de les de poner na chaqueta. El robu del sieglu.