El RIDEA celebra un ciclu de conferecies de novela histórica n'asturianu y castellanu sobre la Edá Media y la Guerra Civil

Coordínenlu Marta Pérez Toral, Ramón d'Andrés y María Esther García López, y va contar con sesiones los xueves de payares.

'La novela histórica en Asturias/La novela histórica n'Asturies' ye'l ciclu de conferencies entamáu pol Real Instituto de Estudios Asturianos (RIDEA) qu'arranca esta tarde con una mirada a la 'Novela histórica en castellano sobre la Edad Media' por Fulgencio Argüelles, Pilar Sánchez Vicente y María Teresa Álvarez baxo la moderación de Lorenzo Arias. El turnu del asturianu va ser n'ochos díes con Xulio Arbesú, Nicolás Bardio y Xandru Martino, que van tar acompañaos por Alejando García Álvarez-Busto.

Les otres dos sesiones van dedicase a la 'Novela sobre la Guerra Civil y la posguerra'. El xueves 16 va celebrase la conferencia que va tratar la producción en castellanu, cola participación de Laura Castañón, Dorita García Blanco y Carmen Alfonso (sobre la obra de Dolores Medio) xunto con Eduardo San José, mentes que l centrada nel asturianu va ser el 23 cola presencia de Francisco Álvarez, Dolfo Camilo Díaz y Cristóbal Ruitiña, faciendo'l llabor de moderador Pablo Corral.

Toles sesiones del ciclu, que cuenta cola collaboración de l'Asociación d'Escritores d'Asturies, van principiar a les 19 hores nel salón d'actos del RIDEA, con entrada llibre hasta completar aforu.