El retornu de El Gomeru

"El Gomeru" ye ún de los clásicos del cómic n'asturianu. Siempre embaxo la coordinación d'Isaac del Rivero y la edición de Trabe la revista apaeció nun primer momentu con cuerpu propiu y con formatu de periódicu y col tiempu incluyó tamién noticies n'asturianu. Dempués recuperó práuticamente'l so calter puramente gráficu y pasó a formar parte, como seición selmanal d'ocho páxines, del diariu 'El Comercio' de Xixón hasta finales de la década de los noventa.

Agora "El Gomeru" vuelve a salir a la cai de baldre, con periodicidá mensual y col sofitu de la Conseyería de Cultura, Comunicación Social y Turismu. La distribución va ser per tolos centros escolares d'Asturies y nes llibreríes. La revista va constar de venti páxines a tou color, diecinueve d'elles dedicaes a cómics y una a la sección "Fauna Astur" na que va esplicase cada mes la vida y característiques d'un animal de la nuestra fauna. Esta sección cuerre al cargu d'Inaciu Galán, conocíu de los nuestros llectores por ser collaborador d'Asturies.com

Ente los dibuxantes de los primeros númberos d'esta etapa nueva de El Gomeru van tar autores como Enrique Carballeira, Adolfo García, Iván García, David Lafuente, Lucía Bande, Frank Pérez, Diego Bernardo, Robert, Pilar Sánchez, etc. Sicasí la idea de los editores ye que seya una revista abierta a la entrada d'autores nuevos en cada nuevu númberu. Los cómics van ser toos ellos orixinales n'asturianu o traducíos d'otres llingües, llabor que va facer tamién Inaciu Galán y González.