El responsable del San Patriciu neoyorquín visita Asturies

El manager del desfile de San Patriciu, John Dunleavy, entama güei una visita a Asturies pa entregar el premiu a la meyor banda de gaites del desfile de San patriciu que se celebró en Nueva York el pasáu mes de mayu y que ganó la banda conxunta qu'iguaron aquel día les bandes de Lluanco y Corvera.

Esti añu 2005 yera la primer vegada qu'una banda de gaites asturiana taba convidada a un actu tan importante y, la primera tamién, qu'una banda de gaites desfilaba peles cais de Nueva York, Quinta Avenida incluyida. La bona actuación de la Banda de Gaites de Corvera y de Lluanco, dirixida pol gaiteru Bras Rodrigo, fizo que los músicos asturianos obtuvieren del xuráu irlandés el Premiu a la Meyor Banda de la División Internacional -nel desfile participaben más de 200 bandes- de la Gran Parada neoyorquina de San Patriciu, santu patrón de los irlandeses en tol mundu. El desfile sirvió tamién p'axuntar a les comunidaes emigrantes asturiana y irlandesa en NYC.

John T. Dunleavy Director d'esti Festival, asiste a Asturies convidáu pol Gobiernu pa facer entrega del troféu a Corvera y Lluanco. La visita va aprovechase tamién pa que l'importante convidáu irlandés conoza'l nuestru país y a los sos artistes tradicionales más representativos, pa lo que ta previstu un programa d'actos culturales y sociales que dende la Conseyería d'Asuntos Esteriores cuenten con que valgan pa estrenchar rellaciones ente la comunidá irlandesa nos EEUU y Asturies.