El rector Ignacio Villaverde posiciónase a favor de la oficialidá del asturianu

“Con absoluta normalidá y probablemente con una cierta satisfaición”. Asina recibiría la Universidá d’Uviéu la oficialidá del asturianu, aseguró’l rector de la institución al ser entrugáu por esta cuestión esti llunes.

Entovía en funciones a la espera de la so proclamación depués de ganar les eleiciones, Ignacio Villaverde valoró la oficialidá del asturianu como daqué positivo. Foi en declaraciones a RPA, pero tamién a entrugues de periodistes a la entrada de les primeres xornaes del Institutu de Ciencies y Tecnoloxíes Espaciales d’Asturias (ICTEA) na Aula Magna del Edificiu Históricu por mor de l'anuncia fecha pol presidente Adrián Barbón el sábadu d'entamar una negociación pa la reforma esclusiva del artículu 4 del Estatutu d'Autonomía.

Rescampló nuna entrevista na radio pública que “yo emplego l’asturianu nos mios discursos oficiales con toa normalidá, anque reconozo que nun lu falo, buscando esa imaxe d’absoluta normalidá y normalización nel emplegu d’una llingua que nos define como comunidá y qu’amás ye un patrimoniu cultural d’una importancia enorme”. Al respeuto, confirmó qu’ún de los sos oxetivos del so mandatu ye normalizar entá más l’asturianu na institución y que la oficialidá recibiríase “con absoluta normalidá y probablemente con una cierta satisfaición”.

Nel patiu del edificiu históricu apuntaría al restu de medios que la oficialidá sería “un pasu más” nesa normalización yá en marcha na institución. “Dende’l puntu de vista constitucional y alministrativu, la oficialidá esíxenos a les alministraciones adoptar una serie de midíes que la Universidá d’Uviéu adoptará; será la primer en facelo, ensin dulda”.

Na semeya, Villaverde –segundu pela izquierda– xunto con Irene Díaz Rodríguez; el conseyeru de Cienca, Empreses, Formación y Emplegu, Borja Sánchez García; y Javier de Cos, enantes de la presentación y bienvenida de les primeres xornaes del ICTEA p'aldericar sobre los retos científicos del futuru.