El Real Uviéu nun dexó espurrir una pancarta al favor de la TV n’asturianu nel Carlos Tartiere

Los responsables del Real Uviéu nun consintieron ayeri l'accesu al estadiu Carlos Tartiere d'un grupu de militantes de la organización Xunta Pola Defensa de la Llingua Asturiana, que queríen repetir l'acción pacífica de protesta que desarrollaren la selmana anterior nel partíu Real Uviéu - Real Unión espurriendo una pancarta al favor de la presencia de la llingua asturiana na TV autonómica.

Si na otra ocasión los militantes de la Xunta nun tuvieron problemes pa espurrir dientro del estadiu la pancarta col testu "La TV asturiana na llingua Asturiana", con motivu del alcuentru que disputaron ayeri l'Uviéu y el Racing de Santander B, el personal de la puerta pela que diben acceder al campu los militantes de la Xunta torgó-yos la entrada, empobinándolos de mano pa una puerta de serviciu per onde se-yos indico que yera per au teníen d'entrar les pancartes. Los militantes de la Xunta siguieron les indicaciones de los emplegaos del club, pero al llegar a la puerta de serviciu esplicóse-yos que nun podíen pasar con aquella pancarta porque "nun s'almitíen reivindicaciones". Con too y con ello, ayeri viéronse en Tartiere otres pancartes con testos críticos cola directiva y accionistes del equipu.