El Puntu d’Alcuentru Internacional d’Asturex aconseya a les empreses sobre les sos posibilidaes d'accesu a 52 mercaos

Uviéu va acoyer la selmana qu’entra’l decimoctavu Puntu d’Alcuentru Internacional col qu’Asturex pon a disposición de les empreses del país informaciones sobre les sos posiblidaes de negociu nel estranxeru. Éstes van poder recibir datos sobre servicios y ayudes p’acceder a 52 mercaos internacionales.

La Sociedá de Promoción Esterior Principáu d’Asturies (Asturex), dependiente de la Conseyería d’Emplegu, Industria y Turismu, entama esta edición nueva d’esta iniciativa que busca impulsar el saltu a otros países de les empreses llariegues. Ésta va comenzar el llunes, a les 17 hores, nun actu nel que va tar presente’l conseyeru Isaac Pola, y va tener como sede l’Eurostars Hotel de La Reconquista.

Les firmes asistentes van tener accesu mientres trés díes a 28 consultores de la rede esterior d’Asturex mediante un sistema de cites previamente concertaes ensin costu dalgún. Pa ello han d’inscribirse al traviés d’esti enllaz enantes del xueves.

Nesti marcu, va facilitase información a les compañíes sobre les posibilidaes de los sos productos y servicios n’hasta 52 mercaos estranxeros. Amás de les entrevistes individuales, les compañíes van poder obtener datos sobre los servicios qu’ufre Asturex nos puntos informativos habilitaos pa ello.

Ente éstos destaquen los d’asistencia téunica, los programes d’iniciación o desarrollu comercial internacional, los consorcios y proyeutos de cooperación, les aiciones de promoción y planes sectoriales, el comerciu electrónicu, el marketing dixital internacional y les llicitaciones públiques internacionales. Cámares de comerciu, la Federación Asturiana de Empresarios (FADE), Liberbank, l’Instituto Español de Comercio Exterior (ICEX), los puertos d’Avilés y Xixón, y la Compañía Española de Seguros de Crédito a la Exportación (CESCE) tamién van tar presentes nesti Puntu d’Alcuentru Internacional nuevu.

Na semeya, países participantes nel XVIII Puntu d'Alcuentru d'Asturex.