El PSOE ye'l partíu más votáu n’Asturies, pero FAC consigue un diputáu más polos sos resultaos na circunscripción central

Tres la finalización del recuentu de votos a la Xunta Xeneral, el PSOE se mantién como’l partíu más votáu n’Asturies, anque FAC consigue un diputáu más que la formación de Javier Fernández gracies al so resultáu espectacular na circunscripción central, onde sacó 9.088 votos más que los ‘socialistes’. En total, el PSOE va tener 15 diputaos tres algamar 177.714 votos, lo que supón un 29,77 por cientu del total, polos 177.588 apoyos que recibió Francisco Álvarez-Cascos (29,75 por cientu). Hai qu’esperar agora al recuentu del votu emigrante pa conocer los resultaos definitivos.

Estos resultaos suponen al PSOE la perda de seis diputaos en comparanza colos rexistraos nel 2007. Tamién mengua la representación del PP na Xunta Xeneral, que va tener que conformase con diez escaños, la metá de los que ganaron hai cuatros años, tres sumar 118.930 votos, un 19,92 por cientu. Los que sí meyoren resultaos son la coalición IX-LV pese a nun dir con Bloque por Asturies: mantienen los cuatro diputaos y pasen a recibir el 10,34 por cientu, un 0,61 más que nes eleiciones anteriores, al sumar 61.513 votos.
 
UPyD nun consiguió representación na Xunta Xeneral como esperaben tres los bonos resultaos nes europees. Ignacio Prendes, el candidatu de la formación que refuga la oficialidá del asturianu recibió 14.662 apoyos (2,46 por cientu), y pasa a ser la quinta fuercia más votada. La sesta ye Ideas, con 6.337 (1,06) y la sétima, Bloque por Asturies-UNA, con 6.160 (1,03). Pela so parte, Unión URAS-PAS sumó 2.948 votos (0,49) y Conceyu Abiertu, 1.529 (0,26).
 
Na circunscripción central, FAC foi la fuercia más votada al sumar un 30,14 por cientu de los votos pol 28,24 por cientu del PSOE. Ello da a Álvarez-Cascos 12 diputaos y a Javier Fernández, 11. El PP consigue 7 (19,09) por esta circunscripción y IX-LV, los sos cuatro escaños (11,19). Bloque por Asturies-UNA consiguió 5.549 votos (1,16 por cientu); Unión URAS-PAS, 2.457 (0,52); y Conceyu Abiertu, 1.314 (0,28).
 
Mentes, na occidental el repartu foi de dos diputaos pal PSOE (36,40 por cientu), PP (25,02) y FAC (24,84). Unión URAS-PAS foi la fuercia asturianista más votada nesta zona con 335 votos (0,45 por cientu), penriba de Bloque por Asturies-UNA, que sumó 319 (0,43), y Conceyu Abiertu, que tuvo que conformase con 71 (0,10).
 
Por último, na oriental, PSOE (35 por cientu) y FAC (33,59) sumaron dos, y el PP (20,34), ún. El Bloque por Asturies-UNA confirmóse nesta zona como la sesta fuercia más votada con 292 apoyos (0,64 por cientu), mentes qu'Unión URAS-PAS algamó 156 votos (0,34) y Conceyu Abiertu, 144 (0,31 por cientu).
 
La participación nes eleiciones nacionales y llocales foi del 67,15 por cientu, mui superior a la del 2007, cuando participaron un 61,59 por cientu de los eleutores. El porcentaxe de votos en blancu foi del 2,57 por cientu (un 0,18 mayor) y el de nulos, del 1,45 por cientu (un 0,65 mayor).