El PSOE y el PP refuguen crear l'Institutu de la Memoria Democrática Asturiana que proponía IX-BA-LV

La Xunta del Principáu refugó güei la proposición non de llei d'Izquierda Xunida-Bloque por Asturies-Los Verdes na que se proponía la creación d'un institutu de la Memoria Democrática Asturiana como una entidá de derechu públicu y con plena capacidá d'obrar, que tenga como finalidá desplegar les polítiques del Gobiernu autonómicu en relación a la recuperación, conmemoración y fomentu de la memoria democrática nel periodu 1931 a 1977.

El diputáu d'IX-BA-LV, Jesús Iglesias, foi l'encargáu de defender la proposición non de llei presentada pol su grupu. Na so intervención manifestó que la puesta en marcha de la Llei de Memoria Histórica va requerir el desarrollu de les iniciatives per parte de les comunidaes autónomes.

"El nuesu grupu aspira a que se constituya un institutu qu'afronte estes iniciatives, que deben impulsar la reconocencia de les víctimes y represaliaos asturianos de la Guerra Civil, asina como contar con un órganu de dirección propiu y un órganu asesor configuráu por profesionales de reconocíu prestixu y nel que tenga cabida representantes de les organizaciones que trabayaron pola preservación de la memoria democrática.

La diputada socialista Mercedes Fernández manifestó que'l PSOE "comparte dafechu los oxetivos d'IX" pero nun comparte l'organismu propuestu porque considera que ya existen organismos suficientes p'algamar esos oxetivos.

Nesti sentíu, refirióse a la existencia del Archivu Históricu o los fondos documentales de dalgunes instituciones.

Sobre la reconocencia de les víctimes y les sos families, Fernández resaltó la reciente aprobación de la Llei de la Memoria Histórica, qu'al so xuiciu ya va suponer l'adopción d'una "amplia gama" de midíes pa los represaliaos, colo que ya van poder cumplir otru de los oxetivos marcaos por IX na proposición non de llei. "Nun consideramos oportunu crear un nuevu organismu que va duplicar los gastos porque ya se cumplen les funciones pa les que se crearíen", dixo.

"Compartimos dafechu la filosofía de la proposición, pero pensamos que nun deben duplicase les entidaes ensin necesidá", dixo Álvarez.

El parlamentariu 'popular' Joaquín Aréstegui foi l'encargáu de defender el votu negativu de la so agrupación. Pal diputáu del PP el periodu al que se refier la proposición d'IX-BA-LV ye un periodu "qu'hai qu'echar a dormir, porque foi terriblemente horrible pa los españoles", mientres qu'al so xuiciu "IX pretende recordar esi periodu constantemente".

"Pa nós si dalgún periodu hai que recordar ye'l de 1977 hacia alantre, un momentu dignu d'imitar, recordar y almirar", dixo Aréstegui, qu'añadió que la etapa 1931-1977 hai que "sacala de la política y del Parlamentu y llevala a la Universidá". "Nun ye un periodu dignu de tar dándo-y vueltes y pidimos que les coses se devuelvan a la historia porque nun fai bien a nengún de los españoles tar dándo-y vueltes", manifestó'l diputáu del PP.