El PSOE ganó unes elecciones nes que’l PP foi la fuerza más votada

El PP recorta diferencia col PSOE llogrando 20 escaños y superando en votu a los socialistes

Con prácticamente'l 100% del votu escrutáu, el PSOE vuelve a ser la fuerza más representada na Xunta Xeneral del Principáu d'Asturies, llogrando 21 escaños contra 20 del PP. Sicasí, esti resultáu tapez el fechu de que'l PP foi ayeri la fuerza política más votada n'Asturies, superando al PSOE en cerca de 1.200 votos. La xuba del PP ye especialmente fuerte na circunscripción central, onde la llista d'Ovidio Sánchez llogró 11.000 votos de ventaya sobre la de Vicente Álvarez Areces y onde dambes formaciones empataron a 15 escaños. La participación foi del 61,8%, más de trés puntos perbaxo de la tasa del 2003, cuando se llegó al 65% de participación.

Los resultaos de les ales entornaron la votación del llau del PSOE. Nel occidente hebo empate a trés escaños, anque los socialistes ganaron por un marxe de 8.000 votos. L'escañu definitivu foi'l del oriente, onde'l PSOE ganó por 3 a 2 al PP por un marcxe de poco más de 1700 votos.

La tercer fuerza en llograr representación foi Izquierda Xunida. La formación encabezada por Jesús Iglesias foi a renovar les cuatro actes de diputaos que llograre nel 2003, pero féxolo acusando una perda de votos enforma grave, baxando de los cerca de 74.000 de les anteriores elecciones a poco más de 57.000 nesta convocatoria.

Fuera de les puertes del palaciu de la cai Fruela quedó la coalición URAS-PAS que namás algamó 13.233 sufraxos en toa Asturies, 10.944 d'ellos na circunscripción central, un 2,4% de votos que nun foi abondu pa devolver a Sergio Marqués y a Xuan Xosé Sánchez Vicente al parlamentu.

Más atrás quedaron les opciones de les dos llistes nacionalistes que se presentaben, Unidá, que llogró 3.847 votos, y Andecha Astur, que quedó en 2.727 sufraxos.