El PSOE ganaría les elecciones, diz el CIS

Ta acabante de dase a conocer l'informe de Comunidaes autónomes del CIS del mes de setiembre del 2.002. Fechu sobre un total de 493 entrevistes particulares, l'informe apurre datos que, anque nin con muncho definitivos, dan una idea de per onde van dir los tiros nes elecciones del añu qu'entra.

Según l'estudiu del CIS, de facese elecciones nel momentu de la entrevisa, el 33% de los encuestaos votaría pol PSOE, el 17,4 al PP y el 4,3% a IU. URAS y PAS nun apaecen nesta encuesta, na que "otros partíos" recibiríen el 3% de los votos pero na que tamién apaecen un 25% de xente que nun sabe que va votar. Llama l'atención que n'otru de los separtaos de la encuesta, el 55% de les persones entrevistaes dicen que voten siempre pol mesmu partíu, y tamién rescampla'l fechu de que los encuestaos nun tienen en mucha estima a los partíos d'ámbetu asturianu, en cuantes que'l 42% nun tan d'alcuerdu con que seya meyor votalos nin nes autonómiques.

Otros datos rellacionaos cola política son los qu'evaluen lo contento o malcontento que ta la xente colos responsables políticos. Nel casu del gabinete asturianu, el 48% de los encuestaos dan de pasu el llabor del Presidente Álvarez Areces, que saca asina más nota que'l gabinete que preside, que namás llega al 45% de sofitu a la so xestión. Entovía más, hai más xente que-y parez malu el llabor de la oposición que los que suspenden el labor del gobiernu autonómicu.

Respective al desarrollu del Estáu de les Autonomíes, la encuesta nun diz que los asturianos notemos muncha diferiencia ente'l funcionamientu de l'alministración enantes que coles competencies que tenemos tresferíes. El desarrollu del procesu autonómicu abúlta-yos que ta bien al 70% de los encuestaos, y el 53% tan contentos col funcionamientu xeneral de l'autonomía asturiana, anque, al entrar en temes particulares, el Gobiernu asturianu sispende en polítiques d'emplegu, vivienda, industria y comerciu y tamién n'agricultura y pesca. Un tantu per ciento significativu (33,7%) camienta qu'Asturies tendría de tener más competencies de les que xestiona anguaño, anque al 39,8% parez-y que les que tien yá son abondo. Ye curioso ver que los encuestaos piensen que les decisiones del Gobiernu español y del asturianu afecten-yos prácticamente lo mesmo les unes que les otres.

Tocantes al tema de les identidaes, énte la entruga "¿Qué términu prefier usté. pa referise al Principáu d'Asturies?" el cuestionariu namás daba a escoyer ente los términos Rexón y Nación, qu'escoyeron respectivamente'l 95,7 y el 2,4% de les persones encuestaes. A la hora de definise como asturianu o español, el 66,5% dixeron ser tan españoles como asturianos, pero'l 20,7% declararon que yeren "más asturianos qu'españoles" y un 2,7% namás asturianos, contra un 4,1% de "más español que asturianu y otru 4,1% de"namás españoles". Esta entruga namás tuvo un 4% de persones que nun supieren o nun quixeren contestala. L'estudiu pue consultase enteru nel web del CIS

Contador Estadistiques