El PSOE gana unes elecciones 11 años dempués

El PSOE dio-yos ayeri un reblagu históricu a toles encuestes electorales, que nun-y daben más de cientu cuarenta y pico rescaños. Na selmana más alloriante na vida política y social n'España dende la muerte de Franco, el PSOE entornó dafechu la tortiella electoral y acabó ganando por 164 a 148 escaños contra'l PP, que s'enfrenta agora a cuatro años na oposición pa los que nun ta preparáu sicolóxicamente y colos que nun contaba hasta'l mesmu momentu del recuentu. La cara del ministru d'Economía Rodrigo Rato y la d'Aznar yeren quiciás les que meyor retrataben el drama del PP, que perdió en cuatro díes, y por fallos propios, unes votaciones que tenía amarraes en toles encuestes.

El vuelcu electoral nun foi tal n'Asturies, onde'l PP caltuvo en númberos absolutos el votu del añu 2.000 y, anque'l PSOE xubió enforma sacó más votos que'l PSOE, anque ello traduzse nun empate nel repartu d'escaños, con 4 asientos en congresu pa cada formación. Izquierda Xunida baxa 8500 votos y confirma'l mieu que teníen ayeri munchos de los sos militantes a perder l'históricu escañu d'Asturies por culpa del "votu útil" al PSOE nun contestu marcáu polos atentaos del xueves en Madrid y nel que'l votante históricu del PSOE salió otra vegada a echar la papeleta dempués de quedar en casa nel añu 2.000. Ello ye qu'en tol estáu'l PP namás cedió en númberos absolutos 760.000 votos respective al añu 2.000, mientres que'l PSOE xubió en 2.991.000 votos sobre l'añu 2.000, cuando los socialistes tocaron suelu con Joaquín Almunia de candidatu.

El PSOE asturianu celebró'l resultáu electoral con una folixa na Casa'l Pueblu de Xixón a la qu'asistió'l Presidente Asturianu. Álvarez Areces, quien tuvo que repartise ente la celebración de Xixón y la oficial d'Uviéu xunta Álvaro Cuesta. Areces celebró'l trunfu del so partíu y declaró que "Asturies va a salir beneficiada del cambéu electoral"

El PP asturianu repetía la cara llarga de Rato, y un ovidio Sánchez mas tristayu que lo qu'aveza dicía que'l trunfu del PSOE foi gracies a los atentaos de Madrid y culpaba a los votantes de "tener en cuenta "unos fechos desgraciaos" y non "el cambéu d'España nestos 8 años". Más contenía tuvo la cabeza de llista, Alicia Castro Masavéu, que-y deseó al PSOE contar con mayoría abonda pa facer un gobiernu fuerte y comprometióse a representar a Asturies en Madrid lo meyor que pudiere. Con too y con ello, al PP asturianu quedó-y el consuelu de sacar más votos que'l PSOE y ganar nel senáu, onde s'impusieron al PSOE por trés a ún.

N'Izquierda Xunida consolábense como podíen pola perda del históricu escañu asturianu, parte del trastazu electoral de la coalición en tol estáu. El candidatu Jesús Iglesias, dicía ayeri qu'IX foi importante nesta campaña pa sacar al PP del gobiernu pero llamentábase porque tenía la sensación de que trabayare "pa otros"

Per detrás de los trés grandes partíos, n'Asturies Los Verdes quedaron como cuarta fuercia política con 4.633 votos, mientres que'l PAS cedió más d'un 30% sobre'l resultáu del 2.000 y pasó por poco de la raya de los 4.000 votos, confirmando la llinia descendente del partíu en toles votaciones a les que se lleva presentando dende 1999. Andecha Astur prácticamente repitió'l resultáu del 2.000, quedando colos 1.942 sufraxos qu'algamó cerca del resultáu de va cuatro años (2.042 votos), anque militantes d'AA apuntaben que la cifra nun ye traducción real de la intención de votu a AA por culpa de la cuestión de les papeletes n'asturianu, ún de los exes de la campaña d'AA. Mientres per una parte hebo votos nulos de les papeletes n'asturianu prohibíes pola Xunta Electoral que yeren pa la formación nacionalista, cosa qu'inclusó s'apuntó esplícitamente en dellos casos nes actes oficiales, n'otres meses eses papeletes aceptáronse. La organización ta estudiando los resultaos d'ayeri pa facer un analís oficial. La tercer fuerza asturianista en xuegu, Izquierda Asturiana, estrenóse nunes xenerales con un modestu resultáu de 831 votos, lo qu'entraba dientro de les previsiones de la candidatura qu'encabezaba Faustino Zapico, que cifró l'oxetivu de la campaña en dar a conocer el partíu a la sociedá asturiana.