El PSOE gana ente la emigración, pero nun consigue l’escañu

La Xunta Eleutoral d’Asturies fixo esti miércoles el recuentu de los votos de la emigración asturiana. La FSA-PSOE foi otra vegada la formación más votada, pero nun sacó la diferencia suficiente con FAC pa quita-y un diputáu per occidente.
 
Los ‘socialistes’ necesitaben sacar 635 votos más que’l partíu de Francisco Álvarez-Cascos pela circunscripción occidental pa ganar un acta de diputáu y, asina, pasar a tener 16 escaños y ser la fuercia con más representación na Xunta Xeneral. Sicasí, al final la diferencia de votos foi insuficiente, como esperaben dende’l propio PSOE: 500 por 42, esto ye, 458 más.
 
A falta de conocer la totalidá de los datos de votu per corréu, yá que namái diéronse a conocer los de les cuatro fuercies con representación, el PSOE recibió 1.684 apoyos ente los 3.290 emigrantes que votaron nestes eleiciones. Mentes, el Partido Popular (PP) algamó 677 votos; Foro Asturias Ciudadano (FAC), 273; y Izquierda Xunida-Los Verdes d’Asturies (IX-LV), 250.
 
D’esta forma, los resultaos definitivos dexen al PSOE como’l partíu más votáu pese a tener un diputáu menos que FAC. Los de Javier Fernández (15 escaños) sumaron un total de 179.398 votos; el FAC (16 escaños),177.861 apoyos; el PP (10 escaños), 119.607; y IX-LV (4 escaños), 61.763.