El PSOE de Llangréu pide la reforma del estatutu

L'anulación de la oficialidá del asturianu en Llangréu pol TSXA ta xenerando un debate políticu como nunca se viere en nengún conceyu. Tolos grupos municipales tan posicionándose na tema, y, per primer vez, toos dicen tar a favor d'una salida digna pa esta cuestión que valga p'asentar les bases de la normalización llingüística nel conceyu.El primer grupu en reaccionar foi el d'Izquierda Xunida, partíu mayoritariu y nel gobiernu dende 1995. IX plantegó elevar al Tribunal Supremu l'anulación, y yá tien presentáu un recursu de casación sobre esti asuntu.Sicasí, la reacción más sorprendente foi la del grupu socialista, proponiendo que'l conceyu pidiere a la Xunta Xeneral del Principáu abrir un procesu de reforma estatutaria que llevare a la declaración d'oficialidá. El conceyal socialista Emilio Granda esplicó ayeri a Asturies.com que ye lo que'l so grupu pretende con esta midía. Primero de too, Granda quixo dexar bien claro qu'IX cometió dellos erros gordos en tou esti procesu, solliñando el fechu de que la sentencia del TSXA tien fecha de va un añu y en tou esi tiempu naide nun supo d'ella, motivu pol que'l Grupu Socialista va pidir que s'abra una comisión d'investigación pa esclariar responsabilidaes. En segundu llugar, Granda dixo que la so propuesta d'elevar a la Xunta Xeneral y organismos competentes una petición de reforma estatutaria supón la única salida responsable y realista qu'el so grupu ve a esta tema, porque d'otra manera, andar en pleitos col Tribunal Superior, como propón IX, supón metese nun procesu xudicial que taría perdíu d'antemano y que saldría mui caru pa les arques del conceyu. Granda tamién fizo una valoración política de l'alternativa xudicial que propón IX, que-y abulta que ye una actuación propagandística de cara a la galería ensin más aquello que facese propaganda. Pa Granda, hai que pedir les coses a quien tien la potestá de faceles, y si la oficialidá tien que dala l'estatutu, entós hai que pidir a quien pueda facelo que lu reforme incluyendo la oficialidá, cosa cola que sí que taría d'alcuerdu'l grupu socialista nel Ayuntamientu de Llangréu. Granda esplicó que la so propuesta ye namás pa Llangréu, y que los socialistes llangreanos nun piensen espardela a otros conceyos nos que tenga presencia'l so partíu, nin llevar tampoco la tema a la FSA. Oficialmente, los socialistes asturianos siguen ensin salir del marcu qu'establez la Llei d'Usu y ensin plantegase la oficialidá, lo que dexaría pa prau la propuesta llangreana, porque p'abrir un procesu de reforma estatutaria fai falta que lo pidan dos tercios de los conceyos asturianos.Finalmente, el conceyal socialista tamién reconoció que la evolución de la tema del asturianu nestos años dio bien de vueltes, y que'l so grupu municipal nun ve les coses colos mesmos güeyos que de la que s'aprobó la oficialidá en 1997. D'aquella los socialistes abstuviéronse na votación. Agora, Granda reconoz qu'apuesten por seguir col programa de midíes normalizadores que yá s'echaron a andar en conceyu dende la declaración p'acá.

Contador Estadistiques