El PSC gana en Catalunya en votos y escaños, anque nun tien asegurada la gobernabilidá

Carles Puigdemont quier presentase a la investidura buscando l'apoyu del independentismu magar la baxada d'ERC y CUP, y una astención de los socialistes.

Salvador Illa algamó pal Partit del Socialistes de Catalunya (PSC) un resultáu históricu al ganar per primer vez en votos y escaños. Col 99,48 por cientu escrutáu, cuenta con 42 escaños (27,96 por cientu del total) polos 33 del 2021 (23,02 por cientu).

ERC, partíu nel Gobiernu qu'empatara va 3 años col PSC n'escaños, sufrió la mayor cayida de les eleicones catalanes al perder 13 pa quedar en 20: d'un 21,29 por cientu de votos a un 13,68. El president Pere Aragonès va siguir en funciones, anque yá anunció la so intención de nun garrar l'acta de diputáu.

Junts queda como segunda fuerza con 35 escaños (21,61 por cientu), 3 más que nel 2021 (20,06 por cientu). Puigdemont nun arrenuncia a ser presidente y anunció la so intención de presentase a la investidura buscando una mayoría simple con ERC y CUP, y l'astención del PSC a cambiu d'apoyu en Madrid, una maniobra complicada.

Los republicanos tendríen tamién la oportunidá de dar la presidencia a Illa con un pautu a trés de formaciones d'izquierda xunto con Comuns Sumar o apostar pol bloquéu, lo que llevaría a una repetición eleutoral que Junts nun ve con malos güeyos. Nel primer casu, Aragonès nun entraría nel Gobiernu, yá que confirmó que'l so partíu va dir a la oposición.

Entra la ultraderecha catalana

Completen l'arcu parllamentariu'l PP, qu'aumenta de 3 a 15 escaños (del 3,84 al 10,97 por cientu), al pañar principalmente los votos de Ciutadans, que nel 2019 contaba con 6 asientos (5,67 por cientu) y agora desapaez (0,72 por cientu). VOX aumenta lixeramente'l so resultáu, d'un 7,67 a un 7,96 por cientu, y caltién los sos 11 escaños.

Pierden dos diputaos los Comuns, de 8 (6,87 por cientu) a 6 (5,82). Mayor cayida tien la CUP, presentada como Candidatura d'Unitat Popular-Defensem la Terra, al pasar de 9 (6,67 por cientu) a 4 (4,09 por cientu).

La debutante Aliança Catalana, de perfil ultraderechista y islamófoba, entra nel Parlament con 2 representates con un 3,78 por cientu de los votos. Como primer fuercia estraparllamentaria queda PACMA, con un 1,08 por cientu.

La participación nes eleiciones adelantaes d'ayeri foi del 57,94 por cientu pol 51,29 de va 3 años. Hebo un 1,13 por cientu de votos en blancu y un 0,83 por cientu de nulos.

Na semeya, Illa saludo a la militancia llueu de ganar les eleiciones catalanes. Semeya propiedá del PSC.