El proyeutu de recuperación del robecu na Sierra l’Aramo lleva soltaos 51 exemplares con ésitu

|

Mediu Ambiente continúa apostando pola suelta de robecos na zona de la Sierra l’Aramo. Hasta la fecha reintroduciéronse con ésitu 51 exemplares procedentes de la reserva de caza de Somiedu, cifra que va medrar esti añu.
 
Estes actuaciones tan orientaes a recuperar la población de robecos na Montaña Central d’Asturies y, al mesmu tiempu, revitalizar económicamente la zona orientándola al turismu y a la caza. Asina, el nome d’esti plan impulsáu pola Conseyería de Mediu Ambiente, Ordenación del Territoriu y Infraestructures ye “Proyeutu de recuperación de les poblaciones de robecu na Sierra l’Aramo: La caza como recursu turísticu na Montaña Central d’Asturies”. La idega principal, según señala la conseyería, ye “afianzar una población d’esta especie na zona, de forma que les poblaciones de robecos puedan recolonizar los principales macizos montañosos situados nos conceyos de Riosa, Morcín, L.lena, Proaza y Quirós”.
 
La recuperación del robecu cantábricu, una subespecie única a nivel mundial, “será un exemplu d’interaición positiva ente los ganaderos, habitantes de los núcleos rurales, cazadores y conservacionistes, y podrá xenerar actividaes sostenibles complementaries col desarrollu rural como’l turismu o la caza”, n’opinión de Mediu Ambiente. El plan pa reintroducir l’animal na Sierra l’Aramo principió nel 2007 y, hasta la fecha, permitió la suelta de 51 exemplares con ésitu: 20 na Peña Caranga (Proaza), 12 na vertiente oeste del Aramo (Quirós) y 19 na este (Morcín-Riosa). D’esta forma, al ser puntos cercanos, se prentende que los animales puedan interactuar.
 
Agora, nesta parte segunda del proyeutu de recuperación, l’oxetivu ye lliberar grupos de robecos nes zones onde yá comenzara la reintroducción y garantizar el siguimientu y la vixilancia de los animales yá lliberaos.

Contador Estadistiques