El proyectu presupuestariu permite reorganizar empreses públiques

El proyectu de Presupuestos pa 2011recueye per primer vegada un artículu nel que s'autoriza al Gobiernu, "al actual o al que vengan", a tomar les decisiones oportunes tocantes a la reorganización de les empreses y entidaes públiques.

Asina la esplicó esti miércoles el conseyeru d'Economía y Facienda del Principáu, Jaime Rabanal, que compareció en rueda de prensa tres presentar la presidenta de la Xunta Xeneral, María Jesús Álvarez, les cuentes ellaboraes pol Executivu pa 2011.
  
Rabanal esplicó que les empreses públiques y entidaes son creaes por Llei, colo que con esti artículu incluyíu nel proyectu de Presupuestos “ábrese la puerta a que'l Gobiernu pueda facer una reorganización del sector públicu si asina lo quier".
  
Na cola d’empreses públiques
El conseyeru repitió qu'Asturies ye, tres La Rioxa, la comunidá con menor volume d'empreses públiques y amás les mesmes nun tán soportaes nel Presupuestu, salvo les que tienen encamentaes funciones concretes.

"Nun tenemos un sector públicu empresarial que viva a cuenta del presupuestu, sinón qu'hai un sector empresarial que vive del mercáu en base a la so actividá", dixo Jaime Rabanal.