El programa 'Sones' va poder sentise pela RPA dende esti domingu

La radio pública asturiana va principiar a emitir el programa 'Sones', ún de los de más ésitu que tien la TPA, pela RPA. L’estrenu va tener llugar el domingu cola retransmisión de la segunda semifinal del XV Concursu Cuenca del Caudal.

L’Auditoriu Teodoro Cuesta de Mieres acueye mañana, a les 19.30 hores, la calificación previa a la final del certame entamáu pola Asociación Cultural Güeria San Xuan cola collaboración de la conceyalía de Cultura, que ta prevista pal sábadu día 4. Nesta segunda semifinal va tomar parte dalgunes de les meyores voces del cantar asturianu, cinco intérpretes na modalidá femenina y seis, na masculina: Marisa Valle Roso, María Sánchez Blanco, Águeda Riera, Pilar Barreñada, María Teresa González Soto, Juan Robledo, Rogelio Suárez, Andrés Cueli, Héctor Braga, Fernando García Nuño y Manuel Roza Llera. Amás, l'espaciu cuenta cola participación del gaiteru Pablo Carrera.
   
La gala, que va retransmitise per diferíu’l domingu a les 22 hores, va tar presentada por Sonia Fidalgo y Alberto Cienfuegos.