El Procesu Batura convoca conceyu abiertu

|
Cartelu Procesu Batura conceyu abiertu payares 2019

La iniciativa pa reconstruyir l'espaciu políticu de la izquierda soberanista entamada a primeros d'esti añu sigue p'alantre.

Tres un parón en branu y llueu de la repetición eleutoral, el Procesu Batura reactívase. Convoca pa mañana, a les 12.30 hores nel uvieín Llar La Llegra, un conceyu abiertu.

"Siguimos pensando que n'Asturies hai un espaciu políticu asturianu ensin definir, ensin trabayar nin organizar, que fai falta p'ameyorar les condiciones de vida de les asturianes y asturianos", espresen los sos entamadores. Dende febreru organizaron delles xuntes n'Uviéu, Xixón, Avilés, L'Entregu y L'Infiestu nes que tomaron parte más de 60 persones pa "interesase y a apurrir les sos idees y propuestes".

El siguiente pasu foi la ellaboración de documentos d'análisis de la información atropao, que se presentaron coincidiendo col 25 de mayu y que se treslladaron en conceyos abiertos per dellos puntos d'Asturies. Agora, el Procesu Batura torna a echar a andar porque "siguimos albidrando qu’Asturies adolez d’análisis y propuestes diseñaes dende la realidá asturiana coles que poder da-y otra traza a Asturies" y porque "cualquier proyeutu de construcción social y nacional d’Asturies ha pasar pola participación y la implicación de tola xente que se reclama asturianista, soberanista o nacionalista d’izquierdes, qu’anguaño nun atopa espaciu pa trabayar a comuña con otres", un espaciu que "ha ampliase a otros seutores de la población asturiano que sientan la necesidá de tresformar la sociedá pa vivir nun país más xustu".

 

Contador Estadistiques