El problema de les gaviotes

L'Ayuntamientu de Xixón abrió esta selmana'l concursu que fai tolos años pa contratar la retirada de güevos de gaviota nos teyaos de la ciudá, midida cola que pretende atayar l'auténtica invasión que faen estos páxaros, que tolos años rexistren una xuba esponencial de población. Según datos del mesmu Conceyu de Xixón, de va ocho años p'acá retiráronse cerca de 5.000 güevos, y solo na campaña del 2.002 desaniciáronse cerca de 1.000 ñeros.

La estadística de la población de gaviotes na ciudá nestos años apunta a una xuba mui grande de la población, con 542 pareyes censaes nel añu 2.003, 49 más que nel 2002. El mesmu Ayuntamientu reconoz con ello que les campañes de retirada nun rinden como debieren, y según les sos cuentes, anque se faiga campaña de retirada de güevos, cerca del 30% de los ñeros acaben sacando alantre críes.

Y ye que la especie ye dura como un regodón. La gaviota qu'añera en Xixón ye un animal con una vida media de venti a venticinco años y ente 750 y 1.250 gramos de pesu. Si se-yos retiren los güevos de la primer puesta, la pareya pue echar más puestes de reposición, y amás nun tienen problema pa comer, porque aparte de cebase colo qu'alcuentra, les gaviotes tienen un comederu a midida nel vertederu de COGERSA en Serín. Fontes de la Coordinadora Ecoloxista d'Asturies esplicaron a Asturies.com que'l problema de superpoblación de gaviotes vien precisamente de la esistencia d'esti vertederu del que comen toles gaviotes que depués anden pela costa ente Xixón y Avilés. Pa la COA, la igua a esti problema pasa por dar con un sistema pa tapar el vertederu, colo que la población regularíase ello solo, y non por facer estes campañes de retirada que, amás de valir pa poco, salen cares enforma.