El principau va reclamar pol Prestige nos tribunales

El Gobiernu asturianu va reclamar pela vía xudicial y énte'l Fondu Internacional d'Indemnización de daños por contaminación marítima (FIDAC) los gastos que se deriven de la contaminación del Prestige. El Conseyeru de Xusticia y Seguridá Pública García Valledor esplicó que l'executivu autonómicu renuncia al cobru de les indemnizaciones ministeriales por culpa de la negativa del Ministeriu a abrir una negociación sobre'l cobru de les mesmes

El Principáu peritó en 8,2 millones d'euros el gastu de la retirada de les 4.392 tonelaes de galipote que llegó a la costa asturiana, y diz qu'a esti coste hay qu'amesta-y el gastu que vien del dañu a sectores económicos como'l turísticu o a l'actividá pesquera.

Según el Principáu, el decretu que propón el gobiernu central p'acelerar el cobru de les ayudes obligaría a la comunidá a perder derechos en favor del Estáu y torgaría cualquier reclamación futura pol asuntu del Prestige. El Gobiernu asturianu mando-y n'avientu una propuesta alternativa al Comisionáu del Prestige Rodolfo Martín Villa consistente nuna propuesta de cobru d'ayudes ensin renunciar por ello al derechu a reclamación, pero dende'l comisionáu nun mandaron rempuesta y entienden qu'Asturies acepta la propuesta del Gobiernu Central de cobrar rápido y renunciar a poner más reclamaciones. Contra esta posibilidá, Valledor alvirtió que'l Principáu "nun va pasar pel embudu" y que l'alministración asturiana sigue personada na causa abierta en xulgáu de Corcubión, aparte de que tamién va reclamar énte'l Fidac.


El casu del Prestige entovía ye noticia un añu dempués. La canal pública norteamericana de noticies PBS ta acabante d'estrenar dientro de la so serie "Frontline" el documental "España, la mar ensin llei" nel que'l reporteru Marc Schapiro fizo un importante llabor d'investigación sobre la desregulación esistente en materia de seguranza nel tresporte del petróleu, descubriendo-y al espectador les enguedeyaes estructures de les compañíes marítimes internacionales. El mesmu autor del documental, que pue descargase nel web de la canal de noticies diz que “había vegaes en que paecía que taba investigando nuna operación secreta del Pentágonu". Ente los datos que descubrio'l periodista americanu, el documental esplica que cuando'l Prestige taba en San Petersburgo primero de salir nel so postrer viaxe tenía de capitán a Esfraitos Kostazos, quien dio parte a la naviera de los problemes que presentaba'l barcu pa salir a la mar. En rempuesta, los armadores destituyeron a Kostazos y punxeron a Apostolos Mangouras al frente de la nave.