El Principáu quier aprovechar l’impactu de la Vuelta a España pa promocionar Asturies como destín turísticu

|
El Principáu quier aprovechar l’impactu de la Vuelta a España pa promocionar Asturies como destín turísticu

Les xubíes al monte Naranco del domingu y a Los Llagos el llunes son los finales d’etapa que va acoyer Asturies, xunto a les salíes de Llugones y Colunga. Les 2.500 persones que moviliza la competición van tar cuatro díes y van suponer un beneficiu d’unos 750.000 euros.

El Gobiernu del Principáu quier aprovechar l’impactu mediáticu y deportivu de la Vuelta Ciclista a España, qu’anguaño tamién va disponer d’una xornada de descansu na comunidá, pa promocionar Asturies como destín turísticu. La Vuelta va tener una presencia destacada con dos finales d’etapa n’altu, n’El Naranco (Uviéu) y Los Llagos (Cangues d’Onís), y dos salíes, dende Llugones (Siero) y el Muséu del Xurásicu (Colunga). El día de descansu va ser el 30 d’agostu.

El domingu, la Vuelta remató nel altu d’El Naranco, hasta onde va llegar procedente de la localidá lleonesa de Cistierna. La segunda etapa, ente Llugones y Los Llagos, el llunes 29, va ser l’antoxana pal día de descansu pa los corredores y la organización. El miércoles 31, el Muséu del Xurásicu va acoyer la salida de la decimoprimer etapa con destín a Peña Cabarga (Cantabria).

El Gobiernu asturianu diseñó un itinerariu en collaboración cola empresa organizadora de la competición, Unipublic, que va dexar promocionar la diversidá natural asturiana, del mar al monte, y amosar finxos turístico-deportivos, como Los Llagos.

Amás, la Conseyería d’Empléu, Industria y Turismu ellaboró un plan de difusión coles mires de rentabilizar al máximu l’acción publicitaria en medios de comunicación y redes sociales. Aparte, va aprovechase la xornada de descansu pa realizar un eventu deportivu nel Muséu Fernando Alonso onde van participar los medios acreitaos na Vuelta, a los que tamién se va presentar Asturies como destín turísticu.

La Vuelta moviliza a unes 2.500 persones, que se van agospedar n’Asturies trés nueches. En total, van ser 7.500 pernoctaciones que van inyectar a los establecimientos hoteleros unos 750.000 euros, a razón de 250.000 euros por nueche, según los cálculos de la mesma organización.

Les etapes asturianes de la Vuelta Ciclista a España siguiéronles nel 2015 unos 5.000.000 d’espectadores al traviés de La 1 de TVE y Teledeporte. La etapa reina de la edición pasada, ente L.luarca y la capiya del Alba, en Quirós, llogró la mayor audiencia, con 2.491.000 telespectadores. L’espardimientu internacional al traviés de canales como Eurosport multiplica l’impactu mediáticu de la prueba.

Contador Estadistiques