El Principáu presenta'l so portal de trabayu

La mesma selmana en que salieron los númberos del paru nel mes d'abril, la Conseyería de Trabayu echó a andar el so portal d'emplegu.Con retrasu sobre otres comunidaes que yá tienen servicios d'esti calter funcionando de va tiempu (ver los de Canaries o Cataluña), el Principáu, que recibió va poco les competencies que tenía enantes l'Inem, presentó esta mañana "Trabajastur" el portal-bolsa de trabayu d'Asturies. Les ufiertes de trabayu faen la primer estaya d'esti web, mientres que la segunda ye la d'orientación y formación, qu'inclúi información sobre temes como cursos o ayudes de la Conseyería amás d'asesorar en temes como l'autoemplegu. La tercer estaya ye l'observatoriu, con estadístiques de trabayu n'Asturies. Por supuesto, como casi tolo que sal del Principáu, ta too en castellanu dafechu.Anque na portada del web puen leese titulares como "la construcción y la industria devuelven a la economía asturiana a las vías de crecimiento" lo que nun puede atapecese ye que tenemos una tasa de paru del 14,48%, una de les peores del estáu. La tradicional baxada d'abril dexanos de momentu perbaxo de la barrera de los 55.000 paraos (o meyor dicho paraes, porque la tasa de paru femenina ye del 23,21%) pero con too y con ello nun dexa de ser el peor mes d'abril de va 18 años p'acá en tol estáu