El Principáu presenta los presupuestos pal 2.004

El Conseyu de Gobiernu del Principáu d'esti xueves dio de pasu'l que va ser el Presupuestu Xeneral d'Asturies pal añu 2.004. Les cuentes de l'autonomía van mover un total de 3.100 millones de euros, un 3,85% más que nel 2.003, y empobinen un total de 838 millones d'euros a la inersión.

Ente les novedaes más importantes de los presupuestos pa esti añu ta'l que la lley d'acompañamientu, entovía pendiente d'aprebase, va incluyir una propuesta pa remocicar la llei del Conseyu
Económicu y Social y la creación d'una sociedá mista ente Principáu y empreses constructores pa la creación del nuevu Hospital Central d'Asturies que ñaz con un presupuestu de 90 millones d'euros. otramiente, el presupuestu inclúi una delda de 141 millones, que dende'l Principáu anuncien que va valer pa invertir en vivienda, nel Hospital y entamar polítiques d'incentivación económico. Por Conseyeríes, la de Salú lleva la partida más grande, con más de 1.000 millones de euros, mientres que la más pequeña ye la de Xusticia, Seguridá y Rellaciones Esteriores, que queda con 42 millones d'euros. Educación ye la segunda por presupuestu, con 711.493.335 euros, Mediu Ambiente y Ordenación del Territoriu va xestionar 219 millones, Vivienda y Bienestar Social 177, Mediu Rural y Pesca 160, Industria 149 y Economía 140. Les demás conseyeríes tienen toes presupuestos perbaxo de los 100 millones d'euros. El presupuestu tendrá de dalu de pasu agora la Xunta Xeneral del Principáu enantes de qu'acabe l'añu.