El Principáu presenta l'escalextric de l’autovía minera en Xixón

El Presidente del Principáu presentó ayeri en Xixón l'enllace de l'autovía minera en Ciares (Xixón). Con un presupuestu de 18 millones d'euros la obra va tener una duración estimada de 24 meses, y yá namás ta pendiente d'una ratificación en Conseyu de Gobiernu que va facese'l prósimu día 24 pa pasara darréu a fase de licitación.

La conexón de l'autovía Mieres-Xixón cola ronda de Xixón nel enllace d'El llano diba facese de mano con una retonda nel ramal d'entrada al Llano dende la Ronda, pero la xuba del tráficu na zona y les nueves normes de seguranza que mandaba'l ministeriu foron les causes oficiales pa una riestra de desalcuentros ente l'alministración autonómica y la estatal sobre'l proyectu a realizar que s'espurrió a lo llargo de seyes años hasta que'l 7 de xunu de 2004, yá dempués del cambéu de gobiernu, la Demarcación de Carreteres del Estáu n'Asturies, remitió-y a la Dirección Xeneral de Carreteres del Ministeriu de Fomentu, l'informe favorable y propuesta d'autorización de la obra, que pagar el Principáu, mientres que l'enllace de Siero de la Minera va correr a cargu del Ministeriu de Fomentu

L'enllace a construyir va tener ocho ramales qu'igÿen un total de 7.365 metros, afayando la entrada dende la minera a toles autovíes que crucien nel noyu d'El Llano. Cola solución definitiva, el tueru de l'Autovía Minera tuerce pal norte hasta desembocar nun "escaléxtric" enforma revesosu con 8 ramales que permiten distribuyir el tráficu

El ramal 1 (Uviéu-El Llano) de 909 metros, sustituye al qu'hai agora, con dos pontes de 173 y 75 metros cauna. El ramal 2 (Xixón-Santander), sal del tueru de la AS-1, torciendo y xubiendo pa ponese a empatar cola cota de l'Autovía del Cantábricu y discurriendo en paralelo a la mesma sobre'l tueru de l'Autovía Minera y el Piles, teniéndose n'otru viaductu inferior y con un ramal colector que s'axunta a otru más pa entrar xuntos a la A-8. Esti ramal tien en conxuntu 1.908 metros. El ramal 3 (Santander-Mieres) mide 2.098 metros, el ramal 4 (Mieres-Uviéu) mide 1.000 metros, el ramal 5 (Mieres-Santander) mide 271 metros, saliendo empatáu col ramal 4 y entrando a la vía colectora del ramal 2 pa metese xuntos los dos na A-8. El ramal 6 (Uviéu-Mieres) tien 185 metros que salen del ramal 1 pa entrar al ramal 3. Pa los ramales 7 (Xixón-Uviéu) y 8 (Santander-Xixón), queden les estructures yá esistentes

Como obra complementaria del enllace de Ciares de l'Autovía Minera cola A-8, va facese una Conexón del Enllace de Ciares col tráficu de Xixón , anque esti ta entovía en fase preparatoria. La idega ye torgar que'l tráficu que vien de la retonda de La Coría a la del Llano quede estragáu pol qu'entra a la ciudá dende l'autovía minera y la del cantábricu, pa lo que se tien previsto un pasu inferior perbaxo de la glorieta d'El Llano doblando tamién los carriles de conexón ente les dos glorietes