El Principáu nun descarta matar más llobos

La viceconseyera de Mediu Ambiente Belén Fernández, y el director xeneral de Recursos Naturales Cristino Ruano dieron una rueda de prensa pa presentar les últimes novedaes nel Plan de Xestión del Llobu d'Asturies. Fernández y Ruano insistieron en que la Conseyería nun piensa facer batíes de llobos pa controlar la población, y esplicaron con detalle les actuaciones que van facese nos próximos meses, que van centrase en meyorar el peritaxe y pagu de les ayudes a ganaderos por ataques de llobu, anque nun se descarta la muerte de más exemplares de la especie.

Los dos responsables políticos llamentaron que s'utilice'l llobu demagóxicamente con enfotu electoralista . Sobre'l tema de les ayudes a ganaderos, Ruano y Fernández esplicaron que d'equí a la vuelta poco va ponese un teléfonu d'atención centralizáu al traviés del que negociar les ayudes en casu d'ataque y dieron munchos datos sobre los espedientes d'ayudes nestos dos últimos años. D'otra manera, tamién va adoptase un modelu nuevu dafechu de fueya de valoración de daños. Según esplicaron, amás de que nesti exerciciu recuperáronse 55 de los 166 espedientes pendientes dende l'añu pasáu, ta rexistrándose una baxa de los ataques de llobos al ganao, datu que la conseyería ve como positivu. Ello ye que mientres a 1 de xunu del 2003 había 747 espedientes de daños enriba la mesa, un añu dempués namás hai 460. La Conseyera llamó l'atención sobre la cantidá de 107.000 euros que se lleven gastaos nes 351 ayudes que yá se lleven tramitaes esti añu por daños de llobu como amuesa del compromisu de l'alministración colos ganaderos afectaos

Con too y con ello, la Conseyería, que l'añu pasáu mató 7 llobos en L.lena, Amieva, Llaviana y Cabrales, tampoco nun descarta más muertes en casu de ser preciso. Según datos oficiales población de llobu ta asitiada en cerca de 200 exemplares, y esisten dellos llugares onde l'altu índiz de daños pue convertilos n'escenariu d'abatimientu d'exemplares. Asina ye pa la parte de los Picos d'Europa, la Sierra'l Cuera, la cuenca'l Caudal y el Conceyu d'Allande. Cristino Ruano negó que la Conseyería tea faciendo o que cuente con facer batíes pelos montes, y que'l métodu que s'emplega p'abatir los exemplares ye'l de recechu, nel que'l cazador espera nun puntu fixu'l pasu del animal en cuenta de persiguilu pel monte. Sobre la polémica pola muerte a palos de siete llobercos nel Parque Nacional de los Picos d'Europa, Cristino Ruano dixo que la Conseyería nun tien nada que dicir en cuantes que ye un asuntu competencia de Parques Nacionales