El Principáu mete-y tixera a la llingua

El vienres espublizose nel BOPA la redacción definitiva del esperáu curriculum d'enseñanza secundaria p'Asturies. El profesor Xosé Antón González Riaño, ún de los redactores del mesmu, denuncia que'l testu final manipulose sobre lo que se redactare de mano, dexenerando la propuesta curricular nun documentu enllenu d'imprecisiones y errores que nun son pa nada inocentes y que respuenden a un enfotu evidente por facer de menos a la llingua asturiana nel sistema educativu. Pa Riaño, el curriculum ta escritu dende una mentalidá franquista que quier reducir la llingua asturiana a un dialectu del castellanu, una consideración que nengún llingüista seriu fai dende va más de venticinco años y que supón recular nel camín abiertu cola creación de la mesma Academia de la Llingua en 1981.Les esnidioses descripciones que se dan nel testu curricular sobre l'asturianu son como p'analizales una per una. Por poner un casu escandalosu, el Diccionariu de la Llingua Asturiana sal nel curriculum como "Diccionario de lengua tradicional" una redacción inesacta en tantu quw nun hai nengún diccoionariu que se llame asina y que trata la llingua neto que si fore un pallabreru del dialectu d'una aldea. El testu ta estráu de referencies a les "variantes" aneciando en calter fragmentariu de la llingua asturiana, anque quiciás lo más retorcigañao seya onde diz "Iniciación a las peculiaridades gramaticales del bable/asturiano en cada una de sus variantes respecto al español estandar" una fras que dexa bien afitao que pa la Conseyería d'Educación l'asturianu arriendes d'un garapiellu de fales locales, ta subordináu a un idioma superior.La primer reacción a la espublización del curriculum vieno de l'Academia de la llingua Asturiana. A la institución llingüística aféctala directamente los términos en que ta redactáu el documentu, y reacciona con sorpresa, indignación y rechazu énte una propuesta curricular que "desprecia conceutos básicos como la normalización y recuperación llingüística" y que acaba col "enfotu por algamar un billingüismu equilibráu (asturianu, castellanu) n'Asturies". Pa l'ALLA, el documentu apobáu ye "ideolóxicamente sectariu y converxente con plantegamientos antidemocráticos". L'Academia remata'l so comunicáu pidiendo otra vegada la dimisión del Conseyeru d'Educación y Cultura.