El Principáu manda estudiar les foses comunes

El Conseyu de Gobiernu del Principáu d'Asturies dio de pasu ayeri un conveniu cola Universidá d'Uviéu pa la realización d'un trabayu d'identificación de foses comunes y
llugares d'enterramientu de persones desaparecíes na Guerra Civil.

El Departamentu d'Historia de la Universidá va ser quien desarrolle'l trabayu d'identificación de foses comunes, analizando tolos conceyos d'Asturies col oxetu d'investigar toles muertes que nun tean esclariaes lo mesmo de la Guerra Civil que d'acciones derivaes d'esta y tamién de les víctimes ensin identificar de la represión qu'hubo n'acabando la Guerra.

El conveniu que s'aprebó ayeri plantégase a un plazu de 22 meses a desarrollase en dos campañes, costando la primera 17.179 euros (2,8 millones de
pesetes).

N'acabando tolos llabores, el trabayu va ingresase nel Archivu
Históricu d'Asturies, onde va constituyir un fondu documental específicu pa la
investigación y testimoniu de la memoria histórico. El conveniu inclúi tamien la preparación d'un Centru de Recepción d'Información encargáu de recibir y analizar tolos datos rellacionaos con esti asuntu qu'aporten los ciudadanos y ciudadanes, Alministraciones y organizaciones.