El Principáu entrega güei les sos medayes

El director de la Fundación Príncipe d'Asturies,
Graciano García, recibe güei la medaya d'oru d'Asturies. Xunta
él, tamién s'apurren otres seis medayes na categoría de
plata ente les topamos ala que va pa la escritora Nené Losada, que tien
muncho de la so producción lliteraria n'asturianu.



L'actu va celebrase nel Auditoriu Príncipe Felipe d'Uviéu
a partir de les 19:00 hores. Ellí
Graciano
García va recibir la medaya d'oru d'Asturies, pa unise asina otros
galardonaos con esti premiu como Severo Ochoa, l'investigador Francisco Grande
Covián, l'ex xefe de la Casa del Rei Sabino Fernández Campo y los
poetes Carlos Bousoño y Ángel González.



Nel actu tamién va entregase les medayes na categoría de
plata, qu'esti añu reciben la Organización Nacional de Ciegos
d'España (ONCE); el Real Sporting de Xixón -que celebra
anguaño'l so centenariu-; el xefe del Serviciu d'Endocrinoloxía
del Hospital Central d'Asturies, Francisco Díaz Cadórniga; la
relixosa asturiana María Dolores Muñiz, que trabaya na favela
brasileña de Querentenario, en Ciudá Santos (Brasil), y Manuel
Suárez Fernández, «Lito», que lu recibe a títulu
póstumo, que llevó la presidencia de la Federación
d'Asociaciones de Mayores del Principáu hasta la so muerte.



Tamién recibe la medaya de plata la escritora Nené Losada.
Nené Losada ye l'alcuñu lliterariu de
Carmen Losada Rico,
nacida en Lluarca el 10 de payares de 1921. De formación autodidacta,
Nené Losada amuésase como una temprana escritora de relatos y
poemes en castellano. Entamando tiempu más tarde a facelo na llingua del
so llugar, utilizando formes poétiques mui cercanes a les de la
poesía oral popular. La so obra tien como modelu al Padre Galo, al que
conoció de neña, y emparenta, non sólo por tar escrito
tamién en dialectu occidental, cola de la poeta Eva González de
L.laciana; amosando a una bona recoyedora de la lliteratura oral y capacitada
pa componer con estos materiales tradicionales una obra de fondu caláu
llíricu y d'una prestosa eufonía. En 1992 recoyó bona
parte de la so obra en versu nel volume "Cantares valdesanos",
n'edición de Consuelo Vega, que se completa col llibru poéticu
apaecíu en 1997 "Entre apigarcios". Anguaño,
Nené Losada presentó l'antoloxía "Fueyas que
reverdecen" dientro de la colección "Tiempu de Cristal",
qu'edita l'Atenéu Obreru de Xixón.