El Principáu declara bien d'interés cultural un palaciu del sieglu XV en Tinéu

El Conseyu de Gobiernu del Principáu d'Asturies declaró ayeri Bien d'Interés Cultural, con categoría de monumentu, el Palaciu de los García de Tinéu.

El Palaciu de los García de Tinéu ye una de les construcciones más destacaes de la villa de Tinéu y ún de los pocos casos d'arquitectura civil gótica n'Asturies. Asitiáu nel cogollu de Tinéu, el Palaciu, que ye del sieglu XIV, ta tamién mui allegáu al antiguu conventu de San Francisco, anguaño ilesia parroquial de San Pedro.

El Palaciu de los García espeya sieglos d'evolución de l'arquitectura civil señorial asturiana, partiendo d'un guañu que ye la torre redonda qu'entovía pervive na parte d'atrás, mientres que per delantre la fachada, orixinaria de los sieglos XIV-XV presenta dellos amiestos y remociques de los sieglos XVII y XVIII, qu'afuraquen la fachada orixinal con ventanes molduraes y balconinos.

Xunta la declaración d'esti nuevu BIC, el Conseyu de Gobiernu aprebó tamién les obres de restauración que tienen pendientes dos importantes monumentos d'Uviéu como son la ilesia de Santa María del Naranco y la ilesia de San Xuan de Priorio. L'importe total de les actuaciones en dambos edificios ye de 634.517 euros (Más de 105 millones de pesetes).