El Principáu da-y el preste a la estación d'esquí del Puirtu Braña

La Conseyería de Mediu Ambiente aprebó la declaración d'impactu ambiental de "Fuentes de Invierno" el proyectu estrella de la Conseyería de Cultura, que cuenta con un presupuestu de 7.000 millones de les antigües pesetes

El Boletín Oficial del Principáu d'ayeri espubliza tola resolución de la Conseyería de Mediu Ambiente, que da de pasu l'actuación en Puirtu Braña anque obliga a facer bien d'obres compensatories.

17 pistes d'esquí que faen un total de 8.386 metros, 50 cañones de ñeve artificial, 30 places d'aparcaderu p'autocares y otres 250 pa turismos, trés telesielles, ún telesquí y una cinta tresportadora. Estos son los datos más importantes de la estación de "Fuentes de Invierno"

En xeneral, la Conseyería califica de «moderáu» l'impactu de la estación, sacantes nel casu del impactu paisaxísticu, onde'l dañu se califica de "Severu" .

Ente les actuaciones compensatories que manda la resolución de la Conseyería figura'l esmucir la estación apantallándola con toles cubiertes vexetales que se pueda y poner plantaciones de carrascu -dientro del plan de recuperación d'esti árbol- dientros d'unes condiciones qu'obliguen a la creación d'un total de 150 hectarees de viesca nuevo pa compensar la perda de calidá paisaxística, ello xunta otres midíes sobre les característiques de la estación mesma que manden, ente otres coses, que los edificios de la estación nun ruempan cola estética del llugar y que les muries que se llevanten reciban un tratamientu d'avieyao pa concasar meyor col mediu. La declaración tamién apauta tolo que va ser obligatorio mientres dure la obra, rescamplando'l fechu de que nun va poder ponese fábrica de cementu en llugar de la obra y que tol morteru que se precise va tener que traese de fuera.

Contra la estación presentárense 17 escritos d'alegaciones, los más d'ello d'asociaciones ecoloxistes, anque tamién alegaron grupos de montaña, instituciones como la Fundación Osu, que víen como cola creación de la estación podía tarazase un pasu natural ente les poblaciones oseres del occidente y del centru. Sicasí, los más de les alegaciones solicitaben la retirada del estudiu presentáu, tanto por criterios mediuambientales como económicos, casu de la CNT Ayerana, qu'alegó que les condiciones actuales de calecimientu del clima faen inviable la estación, un argumentu que tamién sorrayó en so día la Coordinadora Ecolxista d'Asturies.