El principáu alxudica'l Casinu d'Asturies

El casinu d'Asturies va asitiase a la fin en local del antiguu cine Hernán Cortés en Xixón. El Conseyeru d'Economía y Alministración Público, Jaime Rabanal, tomo ayeri'l determín d'aceptar el proyectu de "Casino Bahía de Gijón" que yá ta pasáu per Xunta de Gobiernu. Remata asina auna polémica que vien de vieyo y que na so fase final creó abonda rocea ente l'Ayuntamientu de Xixón y el Principáu, qu'apostaben caún por proyectos distintos.

La sociedá alxudicataria comprométese a facer una inversión nel casino de más de venti millones d'euros y a contratar un mínimu de 223 persones . "Casino Bahía de Gijón" va facer tamién un muséu del cine arreyáu al casinu aprovechando l'antigua condición de sala de cine -trancada dende 1985- del local. L'alxudicataria tien agora un plazu de 15 díes p'aceptar la decisión del principáu y d'otros 15 meses pa facer la obra de remocique del antiguu cine y abrir al públicu. De cualquier manera, los ganadores del concursu van tener que facer dellos cambeos nel proyectu orixinal que presentaron, los más d'ellos rellacionaos colos accesos a les meses de xuegu y el control de les mesmes

Tres del nome de "Casino Bahía de Gijón" alcuéntrase'l grupu Díaz-Carbajosa, un entramáu empresarial de titularidá asturiana y que tien al cargu un garapiellu de sociedaes diversificaes ente les que rescamplen la constructora Comar o nel sector d'alimentación la empresa Cafés Oquendo. Nel sector del xuegu, Díaz-Carbajosa lleven la empresa Megabin, que xestiona sales de xuegos recreativos en centros comerciales y tamién dellos bingos, sector d'actividá esti que lleva dende va años de capa cayía.

Con tener esperiencia nel sector del xuegu, la ufierta de Díaz-Carbajosa yera la única que nun tenía esperiencia previo en casinos, cosa que sí podíen dicir los sos competidores, qu'amás presentaben proyectos de munchu más volume. Ente los proyectos que quedaron descartaos taba d'una parte'l "Casino Puente del Piles" y el "Gran casino de la España Verde", proyectu esti segundu que venía cola firma de la multinacional del xuegu Orenes-Franco y que tenía al empresariu hosteleru Miguel Tascón como sociu local. L'Ayuntamientu de Xixón aporfió hasta l'últimu intre por esti proyectu, qu'Economía descartó yá n'avientu del 2.003 por "cuestiones de disponibilidá del terrén" . Otrabanda, el proyectu del Puente del Piles descartóse oficialmente por nun concueyar colo que mandaba'l Plan Xeneral d'Ordenación Urbano de Xixón.