El Principáu alxudica les primeres obres pa "Fuentes de Invierno"

El puestu de la Conseyería de Deportes na Feria de Muestres de Xixón presenta una maqueta de la futura estación d'esquí ayerana, que se cuenta con que funcione pal añu qu'entra na so primer fase.

La estación de deportes de ñeve y iviernu que proyecta la Conseyería de Cultura nel altu Ayer va p'alantre. Ayeri mesmo alxudicábase la obra del edificiu central de la mesma, con un presupuestu de 40.000 euros, a la empresa Benjamín Gras del Castillo, que pue entamar la obra pa primeros del añu qu'entra.

Mientres, na Feria de Muestres de Xixón la conseyería presenta al públicu una maqueta de la estación d'esquí, que va ocupar una importante superficie na fastera del Puirtu Braña y que, con un presupuestu de cerca de 6.000 millones de pestes, ye la inversión más grande de la llexislatura entamada pol departamentu de cultura.

La maqueta espeya les principales característiques de la primer fase de la estación, que va contar con 8.300 metros de pistes esquiables, anque'l proyectu completu cuenta con 14 kilómetros, un datu que nun dexa precisamente a "Fuentes de Invierno" nun bon llugar en comparanza coles demás estaciones de la rodiada. Mesmamente, Payares, que ye de les más pequeñes de la cordal cantábrica, tien más pista esquiable, con cerca de 23 kilómetros, y la vecina estación de San Isidro, en territoriu de Llión, tien más de 20 kilómetros, ello ensin contar cola competencia que pue suponer el macroproyectu d'estación de San Glorio ente les provincies de Cantabria, Llión y Palencia, onde se quier facer la mayor estación d'iviernu de tola cordal cantábrica con un total de 80 kilómetros de pistes.

Precisamente los promotores de San Glorio, encamentaos por un estudiu de la empresa SEMSA (Serveis i Equipaments de Muntanya, S.A) que ye la mesma que fizo'l proyectu de "Fuentes de Invierno", descartaron pa San Glorio la viabilidá d'una estación pequeña, perbaxo de los 10 km de pistes, porque-yos abultaba qu'estes estaciones namás atraen al públicu de la rodiada, siendo incapaces de xenerar un movimientu importante de xente y con ello, de ser rentables, decantándose por una macroestación que pretende ponese a la cabeza d'Europa.

Nesti contestu, el proyectu de Puirtu Braña apaez como un pequeñu ente xigantes, y la so futura rentabilidá paez que tien de pasar, necesariamente, por una coordinación con San Isidro de la que yá ta falándose en reuniones ente dambes alministraciones. La creación de forfaits únicos pa dambes estaciones nun sedría rara de ver nun futuru. De fechu, al otru llau del cordal, la prensa llionesa fala de "Fuentes de Invierno" como de l'ampliación asturiana de San Isidro, mas que vela como un proyectu aparte.

Otru de los factores que condicionen el futuru del esquí na cordal cantábrica ye la xuba de la cota de ñeve y la mengua de les precipitaciones, cada añu más rales per aciu del cambéu climáticu. Nesti sentíu, Puirtu Braña y San Isidro nun pasen de los 2100 metros, cota que s'algama na parte llionesa de la cordal, mientres que San Glorio, con unes condiciones de ñeve mui bones, llega a los 2500. A esti contestu de desxelu yá tan enfrentándose en San Isidro, onde la diputación de Llión tien pensao poner un campu de golf y otres instalaciones complementaries pa los meses en que nun se disponga de ñeve.

Too ello pinta munches solombres na posible viabilidá económica d'un proyectu qu'alcontró la refuga unánime del movimientu ecoloxista, qu'alegó la estación con argumentos como'l de que se partía de la idea d'urbanizar ensin aplicar criterios de sostenibilidá un área natural. Les organizaciones ecoloxistes criticaron muncho l'impactu de les infraestructures de la pista d'esquí, y ye que la obra va precisar de pistes forestales y de meter maquinaria pesao p'acondicionar toa una fastera del monte anguaño selvaxe. Con too y con ello, los ecoloxistes centráronse más nel efectu negativu de la presión urbanística nel altu Ayer más que nos efectos de remontes y telesielles sobre les 77 hectárees d'estensión del proyectu.