El Primer Sidre l’Añu va volver a convertir el Pueblu d’Asturies nuna folixa al rodiu la bébora del país

Fiel a la so cita en feches de Selmana Santa, la Primer Sidre l’Añu torna al Muséu del Pueblu d’Asturies. Per cuartu añu consecutivu, el tendayu del recintu va acoyer una gran espicha que va tener cuatro díes de duración.

La organización del eventu, la revista La Sidra y la Fundación Asturies XXI, caltienen los precios d’ediciones pasaes. Asina, por 5 euros, tolos asistentes van poder prebar sidre de les primeres colleches del 2012, tanto de los llagares con mayor producción como d’aquellos pequeños de los que ye difícil atopar la so sidra. Amás, como ye vezu, van desendolcase una cantidá grande d’eventos paralelos, como charres, tasties guiaes, demostraciones de tonelería, amuesa de tonada asturiana, el Campeonatu Nacional de Sidre Casero Ellaborao en Madera, bailles, xornaes dedicaes a sidra d’otros países o la xornada de la sidra esplumosa, ente otres. Les feches concretes de celebración d’esti IV Primer Sidre l’Añu son del 28 al 31 de marzu.

Otra manera, el 28 de marzu va tener llugar una edición nueva, la décima, del Sidracrucis, un eventu indicáu namái pa los sidreros con aguante. Como novedá, la folixa va entamar con una procesión pol Barriu la Sidra (El Llano, Xixón) –abierta a tol mundu– tres un tonel de Sidra El Duque y un grupu de gaiteros y tamboriteros, con paraes nos siete chigres que conformen esta asociación de sidreríes. Darréu, los participantes nel Sidracrucis treslladaránse al Muséu del Pueblu d’Asturies pa celebrar una espicha dientro del Primer Sidre l’Añu y proceder después a un percorríu per dellos chigres de la ciudá. El pasu siguiente va ser la visita a dos llagares, p’acabar nún d’ellos con una espicha hasta les 22 hores, momentu de salida de los autocares a los sos puntos d’orixe –Xixón, Uviéu y Avilés, nun primer momentu–.

El númberu de places pa participar nesti eventu ta llendáu, polo que los interesaos en participar nel Sidracrucis han de ponese en contautu cola organización lo más pronto posible nel teléfonu 652.59.49.83 o nel corréu electrónicu infolasidra@gmail.com. El preciu pa participar ye de 45 euros, 40 pa los collaboradores de La Sidra.