El primer Conseyu de Gobiernu de la llexislatura celebróse na Aula del Reinu d'Asturies de Cangues d'Onís

La decisión primera d'importancia del Executivu nuevu ye posponer l'aprobación de la Llei d'Impulsu Demográficu pa un mayor consensu.

L'Aula del Reinu d'Asturies, en Cangues d'Onís, foi'l llugar escoyíu pol presidente Adrián Barbón pa celebrar el primer Conseyu de Gobiernu de la llexislatura. Un "xestu reivindicativu" pa poner en valor la primer capital del Reinu d'Asturies, "qu'ha sirvir de faru pa mirar al futuru con esperanza y ilusión".

Na xunta alcordóse posponer l'aprobación del Proyeutu de Llei d'Impulsu Demográficu pa, apunten dende l'Executivu, afianzar el consensu sobre'l testu colos grupos parllamentarios y facilitar el so alderique posterior na Xunta Xeneral. Un xestu al popular Diego Canga, que solicitó per carta a Barbón la paralización del trámite alministrativu cola fin d'incorporar dalgunes suxerencies: "Comprometíme a ser un presidentu de diálogu y de consensu y creo qu'ésta ye la meyor forma d'emprimar una llexislatura", apuntó'l socialista.

Nomamientos nuevos

Barbón anunció na rueda de prensa posterior l'aprobación de los nomamientos de cinco persones que van ocupar les secretaríes xenerales téuniques de les conseyeríes de Presidencia, Retu Demográficu, Igualdá y Turismu; Ciencia, Empreses, Formación y Emplegu; Salú; Educación; y Transición Ecolóxica, Industria y Desendolcu Económicu. Son Andrea Suárez, Beatriz Alejos, Antonio González, Begoña Fernández y Diana Bernardo, de manera respeutiva.

Otra manera, el llavianés va convocar el domingu a los 78 alcaldes y alcaldeses del país a una xunta pa tratar "problemátiques similares y los retos de la llexislatura de forma compartida".