El primer asturianu nel techu'l mundu

La yá clásica Selmana de la Montaña que se celebra tolos años en Xixón gracies al club Torrecerredo en collaboración con otres asociaciones de montañismu del país presenta nesta edición bien de participaciones d'interés, lo mesmo pa la persona metida en temes de montaña que pal públicu xeneral, que puede disfrutar del relatu de primer mano de grandes montañeros.Esti añu la selmana faise n'alcordanza de Julio Bousoño "Bus" célebre montañeru asturianu que xubió 10 veces al Mont Blanc y a otros importantes cumes de Groenlandia y Los Alpes. Mayestru de toa una xeneración de montañeros, Bus desapaeció esti añu n'accidente nos Picos d'Europa .Ente les presencies internacionales d'altor que van tar en Xixón esta selmana rescamplen les figures del italianu Cesare Maestri rei de los Dolomites y primeru n'esguilar el Cerro Torre de la Patagonia o el documentalista Sebastián Álvaro, del programa "Al filo de lo imposible" La selmana entamó ayeri cola presencia d'un especialista en paredes verticales, Tomaz Humar, un deportista capaz d'esguilar, el solu, muries de piedra de más de 1.000 metros como la de "El Capitan" en Yosemite-California. Nel so web, con abondante material gráficu, podemos ver la dificultá técnica que ye quien a superar esti
eslovenu que presume seguir siempre'l camín más abegosu pa llegar arriba.Otramiente, tamién van tar en Xixón el famosu escalador de los 70 y 80 Cesar Pérez de Tudela, que l'añu pasáu sobrevivió a un infartu nel Everest, una montaña que por primer vez conquistó esti añu un asturianu, Jorge Egocheaga, que tamién va falar de la so aventura. Amás de ser el primer asturianu na pica'l mundu, Egocheaga llegó arriba per una de les canales más difíciles, ensin bombones d'aire y nun tiempu récord. Sicasí, la xesta del asturianu tuvo nun tris de nun valer por cuestiones técniques, pero la "notaría oficial" del Everest que xestiona Elizabeth Hawley dende los años 60 sí dio de pasu la marca del montañeru

Contador Estadistiques