El pricipáu estrenó sé en Bruseles

El presidente del Principáu, Vicente Alvarez Areces, inauguró ayeri en Bruseles la nueva sé d'Asturies na capital d'Europa. Al actu oficial,tamién asistieron el presidente de la eurocámara Josep Borrell y l'alcalde de Bruseles Freddy Thielemans.

La inauguración acaba con un plazu d'espera de cuatro años dende que se dio anuncia de l'alquisición del edificiu nel 2001, costando d'aquella l'inmueble 1,08 millones d'euros y precisándose d'otros 3,3 pa remocicalu, una inversión que se cuenta con recuperar, lo menos en parte. Ello ye qu'Asturies estudia compartir l'edificiu con otres rexones europees, siendo los candidatos pa "compartir pisu" de la embaxada asturiana en Bruseles Silesia y Cantabria. Pel momentu ta trabayándose nun analís de los costes de mantenimientu de la nueva sé p'apautar les tarifes que tendríen d'abonar los demás ocupantes de la sé, que, d'otra manera, convierte a Asturies nuna de les poque comunidaes d'españa con un edificiu propiu na capital europea xunta Euskadi, Galicia y Canaries.

El Gobiernu asturianu concibe la nueva sé en Bruseles, que s'asitia nel antiguu edificiu racionalista del periódicu d'izquierdes "Le peuple" como una plataforma dende la que los empresarios asturianos puedan atropar mercaos na Europa ampliada, contando pa ello con una asistencia directa del Institutu de Desarrollu del Principáu (IDEPA) y tamién como un escenariu pa l'actividá cultural asturiana, siendo'l tercer oxetivu del edificiu ser una instalación al serviciu de la emigración -la colonia asturiana en Bruseles ye de más de 12.000 persones- Dientro d'esti oxetivu anuncióse la realización d'un estudiu sociolóxicu de los asturianos en Bruseles, comparando les necesidaes de los de primer xeneración y los de segunda.

L'edificiu del principáu ta enfrente del Muséu Internacional del Cómic, ún de los más visitaos de la capital belga, y cerca de la Grand Place, la plaza más turística de la capital.