El presupuestu de Política Llingüística pal 2012 sufrirá una mengua de 675.000 euros

Francisco Álvarez-Cascos anunció un anteproyeutu de presupuestos con un techu de gastu de 4.208 millones. Pal añu qu'entra, Política Llingüística tien una partida prevista de 2.135.034 euros, 675.525 menos que nel 2011.
 
El Conseyu de Gobiernu aprobó unes cuentes que suponen un recorte del 6,3 por cientu con respeuto a les d’esti añu. El total de la reducción pal 2012 ye de 258.145.161 euros, una mengua importante que, sicasí, supón un incrementu del 1,8 por cientu en comparanza col presupuestu inicial del PSOE pal año 2011, cifráu en 4.133 millones. Nel anteproyeutu, los ingresos non financieros previstos ascienden a 3.808 millones d’euros, mentes que los gastos non financieros sitúense en 4.123 millones. Asina, la diferencia ente dambos importes ye inferior al 1,3 por cientu del PIB nacional previstu nel Plan d’Estabilidá pal 2012 y "permite cumplir con responsabilidá los mandatos del Conseyu de Política Fiscal y Financiera".
 
El xefe del Executivo destacó que s’autoriza a emitir endeudamientu nuevu por un importe máximu de 488 millones. En concreto, na seición de deuda consígnense 312,6 millones frente a los 212,7 del presupuestu axustáu del 2011, lo que supón un 47 por cientu más. D’esi total, 175 se destinen a l’amortización del principal y los 137,6 restantes al pagu de intereses. Amás, les cuentas inclúin una rebaxa de 107 millones d’euros nos gastos de capital, lo que se traduz nun 13,5 por cientu en términos porcentuales. Nesi sen, el capítulu más afectáu ye’l d’inversiones, que se reduz un 24,9 por cientu respeuto al añu anterior, por un importe total de 106 millones d’euros. El presidente xustificó esti descensu na necesidá de garantizar los gastos previstos pa la prestación de los servicios esenciales, ente los que citó la sanidad, la educación y el bienestar social.
 
Bienestar Social y Igualdá, la que más aumenta
 
Toles conseyeríes ven como mengüen los sos presupuestos, a esceición de Bienestar Social y Igualdá (7,4 por cientu); Sanidá (6,7 por cientu); y Educación y Universidaes (2 por cientu). Por contra, la que más pierde ye Presidencia (51,6 por cientu menos), seguida de Cultura y Deportes (28,1 por cientu).
 
Estos presupuestos van presentase la selmana qu’entra na Xunta Xeneral. N’opinión d’Álvarez-Cascos, conxuguen “l’esfuerzu na austeridá y l’aforru col aumentu de partíes destinaes a los servicios públicos esenciales". Entiende que se trata d’un exerciciu de "responsabilidá", yá que recueye les previsiones de gastos reales de toles conseyeríes, atiende les prioridaes y cumple el plan d’estabilidá y los oxetivos de déficit, según esplicó.