El presupuestu de la Universidá d’Uviéu mengua un 2,98 por cientu

El Conseyu de Gobiernu de la Universidá d’Uviéu aprobó’l proyeutu de presupuestu pal 2012 ensin nengún votu en contra. Ésti asciende a 211.502.750 euros, lo que supón una mengua del 2,98 con respeuto al del 2011.
 
Tres esti alcuerdu, remitiéronse les cuentes al Conseyu Social, que va encargase de la so aprobación definitiva. N’opinión del rector, Vicente Gotor, esti proyeutu de presupuestu ta “axustáu” a les previsiones d’ingresos y de gastos na coxuntura económica. Na mesma llinia, el vicerrector de Planificación Económica, Santiago Álvarez, aseguró que dará una "cobertura razonable a tolos gastos ineludibles", de manera especial a los gastos de personal. "Nun ye la cuantía que nos gustaría tener, pero permitirá atender les necesidaes", dixo.
 
Respeuto a los ingresos, la Universidá muéstrase confiada en disponer d’unes tresferencies "equivalentes" a les del 2011 por parte del Gobiernu, anque nun se plantega solicitar al Executivu una xuba nos precios públicos de matrícula pa disponer de más recursos. "Socialmente nun ye correutu pidir que s’aumenten les tases", argumentó Gotor señalando, xunto col so vicerrector, que les tases de matrícula suponen un 18 por cientu de la financiación total, incluyendo tanto títulos oficiales como títulos propios y estensión universitaria, mentes que’l 75 por cientu procede de tresferencies de les alministraciones y, el restu, de prestación de servicios y aportaciones empresariales. Nesi sen, el rector reiteró la so apuesta por una llei que facilite a les universidades tener una mayor aportación empresarial.