El presidente llama al diálogu p'afayar el sistema educativu a la normalidá nueva

"Vamos facelo lo meyor posible pa tar a l'altura d'esti Gobiernu", confirmó Barbón.

El presidente Adrián Barbón tornó a emplegar l'asturianu nuna rueda de prensa na respuesta d'una entruga d'Asturies.com, nesta ocasión sobre los recursos materiales, económicos y de material previstos p'afayar el sistema educativu asturianu a la normalidá nueva anunciada esta selmana pol Ministeriu d'Educación y Formación Profesional xunto col de Sanidá. "Hai un marcu xeneral, que nun ye poco", fechu en consensu coles autonomíes, y "a partir d'ehí tenemos que baxar, tenemos que facer por adaptar la respuesta educativa nacional al ámbitu d'Asturies".

Pa entamalo'l llavianés tien nidio que "hai que facelo dialogando, falando colos coleutivos implicaos: educadores, padres, madres, coles persones que tán trabayando de siguío na materia educativa y, sobre manera, teniendo en cuenta a los neños y neñes, que nun se pueden dexar de llau". Tres asegura que'l "Gobiernu del Principáu d'Asturies yá ta trabayando nesta cuestión", apuntó que "ye pronto entovía pa dar una respuesta, pero dende llueu vamos facelo lo meyor posible pa tar a l'altura de lo que s'espera d'esti Gobiernu".

Otra manera, n'otra entruga sobre educación, Barbón faló del retu que supón tornar a les clases presenciales nos centros en setiembre y punxo en valir el papel de les madres mientres el confinamientu. "Querría tener un recuerdu especial con toles muyeres que tornamos a zarrar en casa p'atender la situación de los sos fíos y fíes, y eso nun pue ser y como Gobiernu nun lo podemos permitir", afirmó.

Semeya (recortada) obra d'Armando Álvarez.