El preciu del ADSL ta varáu

Dende va cuatro años, qu'entamó a espardese'l sirviciu, contratar una llinia d'ADSL de 256 Kbps cuesta 39 euros, un preciu que nun rexistra cambeos contratemos la llinia con quien seya, en cuantes que toles compañíes que furnen d'accesu a la rede per vía telefónica aprovechen la llinia y les infraestructures del xigante Telefónica. La falta de competencia nel sector del ADSL tamién lleva a un inmovilismu nos precios del sector del cable, cosa qu'acusen munchos internautes asturianos, pero la situación pue dar un reblagu cola entrada d'un nuevu competidor que promete muncha más velocidá pol mesmu preciu.

Ello ye que la compañía Jazztel taentamando a ufiertar conexón de banda ancho con una velocidá de xuba d'un megabit per segundu y una velocidá de baxada de datos de 300 Kbs. Estos datos faen d'esta conexón un serviciu 4 vegaes mas rápida que la qu'ufierta Telefónica y demás compañíes que-y arrienden la llinia. Anque delles d'estes compañíes tamién dan a contratar una llinia cola velocidá que promete Jazztel, cóbrenlo a un preciu que multiplica por 8 los 39 euros. De momentu, el sirviciu d'internet a 1Mb namás pue contratase en dellos lugares de Madrid, Barcelona, Valencia, Málaga, Bilbao y Alicante, pero Jazztel cuentacon facer un estoyu de clientes de 2 millones en toa España nel primer añu, pa lo que va duplicar les centralines propies de les 42 que tien agora a 84.

La compañía responsable d'esta nueva ufierta nun dispón, evidentemente, d'una rede propia que llegue hasta la toma en casa del cliente,polo que va emplegar la rede básica de telefónica, pero al llegar la solicitú del cliente a la centralina de Jazztel, un mecanismu va separtar el tráficu propio de Jazztel, que bautizó l'apañu como "desagregación parcial del bucle local".

L'apueste comercial de Jazztel pue revolver un poco'l mercáu, pero l'asociación d'internautes nun ve igua a la situación de monopoliu que tien Telefónica nel sector mas que obligando a cada operador a tener infraestructures propies.