El preciu de la vivienda usao xube n'Asturies el 8%

La casa de tasaciones inmobiliaries Tinsa espublizó ayeri'l so informe periódicu sobre'l preciu de la vivienda n'España. L'informe diz que'l preciu de la vivienda nuevo n'España pegó una xuba del 16,78% hasta últimos de setiembre, lo que vien a contradecir los mensaxes qu'apuntaben a que la escalada de precios nel mercáu de la vivienda tenía traza d'aposentar. Ello ye que nel primer trimestre del añu Tinsa calculó una interanual del +14,57% nel preciu de la vivienda nuevo, tasa que xubió nel segundu trimestre hasta'l 15,27% y agora hasta'l mencionáu 16,78%.

La xuba de precios de la vivienda nuevo vien acompangada d'otra xuba asemeyada de la vivienda usao, que na interanual del tercer trimestre ye del +16,50%. Sicasí, la vivienda usao sí que ta aselando los sos precios, que xubieren un 18% na interanual del primer trimestre y un 17% nel segundu. la estimación de Tinsa ye que l'añu va rematar con una xuba media del 17% en vivienda nuevo y del 15% en vivienda usao.

Desqu'entamare la fase espansiva del mercáu de la vivienda en 1997, los precios de vivienda nuevo nel estáu xubieron más d'un 60%, y de momentu nun parez que vayan baxar. Tinsa cree que pal añu qu'entra'l mercáu de la vivienda podría entrar nuna fase de "desaceleración" pero nunca hasta los índices del -6,5% de baxa de precios que marcaba un estudiu asoleyáu va poco pol BBVA. La casa de tasaciones entiende que la situación d'anguaño, con créditos baratos y una pirámide de población tendente a la creación de families nueves nun da pa ello.

En cuantes a los datos d'Asturies, l'estudiu de Tinsa, que nun apurre datos sobre vivienda nuevo per comunidaes, sí dicen que'l preciu d'una vivienda de segunda mano xubió n'Asturies un 8%, colo que'l preciu d'estes viviendes sí qu'acusa un enfriamientu. Namás Canaries y Castiella y Llión algamen una xuba de precios en vivienda usao igual o más baxa que l'asturiana. Sicasí, analizando per provincies, hailes en que los precios xubieron entovía menos que n'Asturies. Ye'l casu de Teruel (7%) Salamanca (5%) o Burgos (2%)

En precios absolutos, la vivienda usao cuesta n'Asturies 1.103 euros por metru cuadráu, cantidá que da un reblagu na capital pa ponese nos 1.400 euros que cuesta'l m2 de vivienda n'Uviéu. Asturies queda nel estudiu de Tinsa enxerta xunta Cantabria y Aragón nun garapiellu de comunidaes autónomes con precios de vivienda usao un poco inferiores a la media estatal, que ye de 1,276 euros el metru cuadráu. Perbaxo de los precios asturianos quedaríen Estremadura, Galicia, Castiella-Llión y Castiella la Mancha, y penriba toles demás comunidaes, llegando Madrid a dar los precios más altos del estáu con más de 2.500 euros por metru cuadráu de media. Sacantes Madrid, la mayor presión demográfica nes comunidaes del sur y de la costa mediterránea conozse nos mayores precios que tien ellí la vivienda, mientres que'l cuadrante noroeste de la península ye'l que tien precios más baxos.