El PP va pidir la presencia de Jorge Fernández Leon y Areces na Xunta Xeneral pol casu de la “propaganda anónima”

El diputáu del PP na Xunta Xeneral Fernando Goñi dio anuncia de que'l so partíu va pidir la presencia na Cámara, en pasando'l periodu de vacaciones, del director de l'Axencia pal Desarrollu de la Comunicación y Proyectos Culturales, Jorge Fernández León, pa que dea esplicaciones sobre l'orixe del llibru anónimu que ta llegando estos díes a los buzones de les principales ciudaes asturianes y nel que se fai una crónica optimista de les iniciatives del executivu asturianu al traviés de 150 páxines a tou color.



Fernando Goñi, que tamién estudia pidir la comparecencia de la Conseyera de Cultura Ana Rosa Migoya y del mesmu Presidente asturianu Vicente Álvarez Areces, afirmó que "Naide pue creer que nengún particular faiga y reparta de baldre un llibru que cuesta una millonada y que se dedica a facer allabanza al Gobiernu". ElPP albidra que tres del llibru ta'l mersmu Gobiernu asturianu, una acusación que s'encontaría na collaboración activa de l'alministración asturiana cola publicación al traviés de l'apaición de cargos públicos na mesma y na cesión de datos por parte de les instituciones de gobiernu. El PP camienta que la "edición anónima" del llibru pue suponer un intentu d'esmucise de les obligaciones qu'apauta la Llei de Publicidá.