“El PP tenía qu’entrar al Conseyu d’Alministración del Ente”

Adolfo Camilo Díaz, ún de los representantes por Izquierda Xunida - Bloque por Asturies nel Conseyu d'alministración del Ente Autonómicu de Comunicación, representa una de les minoritaries voces crítiques dientro del órganu de gobiernu de la TV autonómica. El yá veteranu escritor y animador de la vida cultural de Corvera y Avilés ye negativu na so valoración xeneral de cómo ta sacándose alantre l'Ente y nun descarta replantegase la so posición dientro del mesmu en pasando'l mes de setiembre.

- Na última xunta del Conseyu d'alministración del Ente usté y Benito Alaez foron les dos úniques voces contraries a la propuesta de documentu base d'actividaes que se fexo. ¿Podría resumir los motivos del so votu en contra?

- Na última xunta que tuvimos del Conseyu d'alministración decidíase'l documentu pol que tenía de mandase'l procesu de contratación de personal. El votu míu en contra vieno obligáu por cuatro coses. En primer llugar, evidentemente, pol papel nulu que se-y daba al asturianu nel procesu. En segundu llugar taba la cuestión de les feches, y ye que lo que se proponía yera un procesu aceleráu ensin tiempu real pa que se pudieren preparar bien los exercicios. El conteníu de los mesmos temarios tamién yera otra razón que pesaba pa votar en contra, y a la fin, taba tamién la cuestión de la incomodidá que produz el que los procesos se quieran sacar alantre ensin posibilidá nenguna de debate.

Aquella foi una sesión tormentosa del Conseyu d'Alministración, pero los que tamos comprometíos cola defensa del asturianu nos medios de comunicación tenemos que ser conscientes de que'l tableru de xuegu ye'l que ye. Esto tiense en trés pates, la primera la política, que ye la que más manda, la segunda la llegal que manda menos, y dempués ta la pata social, que ye la que tien de movilizase -y de momentu ta faciéndolo- pa llograr qu'esta reivindicación salga alantre. Ye más, creo que'l procesu de la TV supón un examen fundamental na historia del movimientu de defensa llingüística.

- Un examen en plenes vacaciones, porque too esto ta pasando nel mes d'agostu, cuando tol mundu reposa o va de vacaciones. Ello y sobremanera les protestes de la Xunta Xeneral, que protestó formalmente porque nun se-y daba parte de les cuentes de gastos del Ente dan la impresión de que l'Ente funciona al marxe de tou control y d'una manera escura ¿ye gratuito que se dean precisamente agora pasos clave del procesu como la convocatoria d'emplegu?

- Pa esto ye válido aquello de la muyer del César, que tenía que ser casta y amás dar impresión d'ello. Yo creo qu'hai que ser inxenuos nesto. Evidentemente xunetu y agostu nun son los meses más afayadizos pa llevar alantre esti procesu, anque creo que tampoco diba pasar nada porque se ficiere en setiembre o ochobre. En cualquier casu, ye evidente que si se pretendía llevar esto en silenciu, agora ya nun hai silenciu nengún y tolos medios falen d'ello. Yo creo que ye más una cuestión de torpeza y priesa que d'otra cosa, como tampoco creo qu'haya trafullu nengún nes cuentes del Ente.

- Como diz usté yá nun hai silenciu, pero ¿caún calla lo que-y interesa nesti procesu?

- Evidentemente, otra cosa ye en que midida se franció'l silenciu y en que direcciones y sentíos, porque ye evidente que en tol entramáu mediáticu asturianu hai intereses creaos sobre esti particular, lo que lleva a que cada mediu tenga la so visión parcial sobre'l tema. Tamos énte un panorama mediáticu iguáu por terminales de grandes grupos non asturianos que como ye de suponer nun tienen un puntu de vista asturianu sobre la cuestión. Nada de lo que digan eses terminales mediátiques va valir pa formase una opinión de la stuación, sobre too no tocante al tema de la llingua, dalgo pa lo qu'hai qu'atender al panorama de medios asturianos "de verdá".

Y dempués tan les cartes que caún d'estes terminales tenga que xugar cola autonómica y col mesmu poder. El fechu de que Telecable retire de la so parriya de programación estratéxica y oportunamente delles canales locales a min si que me paez interesao digan lo que digan, mientres que los editoriales y columnes d'opinión de cada periódicu, cada debate nes televisiones y radios va asoleyando eses cartes que caún tien pa xugar.

- A falta de menos d'un mes pa la estrena de la TV ¿cómo cree que va ser esi entamu de les emisiones?

- Lo d'entamar a emitir el 8 de setiembre ye un caprichu políticu que nun tien xustificación y que va sentar un mal precedente. Ye esperpéntico qu'una televisión que se supón pública y d'un gobiernu laicu vaya estrenase emitiendo poco menos qu'una misa dende Cuadonga tirando pa ello d'equipos particulares contrataos pa la ocasión qu'amás nin siquiera van ser asturianos.

- L'asturiana va ser la única TV autonómica d'una comunidá con llingua propia na que la defensa d'esa llingua nun tenga un pesu decisivu na programación y los oxetivos ¿tamos énte una TV anómala?

- Si, y ye anómala en munchos otros sentíos. Na Xunta Xeneral del Principáu los grupos parlamentarios lleven tiempu cambiando d'opinión sobre'l tema de la TV, en contraste colo que pasó en tolos demás llugares, onde les canales autonómiques nacieron frutu d'un procesu de consensu, mientres que la nuestra naz envelenada por una engarrada ente partíos políticos. Rescampla qu'esta televisión naz garrada con palillos y tien un conseyu d'alministración nel qu'una parte pue aplicar el rodillu. Por eso creo que yera importante que'l PP, más agora col debate internu que tien esti partíu cola cuestión del asturianu, abandonare esa posición que tien de tar al marxe y entrare a participar en Conseyu d'Alministración, derechu que pue executar en cualquier momentu. Ello diba crear otru marcu de rellaciones nel que diba haber más xuegu.

- ¿Queda güecu pa la presencia del asturianu nesta TV?

- Lo del asturianu nun hai per onde garralo y ehí si qu'hai una mano negra que ye la de la parte más talibán de la FSA-PSOE, que tien col asturianu ún de los sos cocos favoritos. La única esperanza que queda nesti sentíu son les bases de programación, que personalmente creo que nun van ser tan males como tolo que llevamos visto hasta agora.

- ¿Y queda güecu a que cambie dalgo dientro del Conseyu d'Alministración?

- Ye difícil cambiar la mecánica que se lleva. Por poner un casu, nun tien munchu sentíu que nun mes tan clave como esti'l Conseyu d'Alministración nun aconceye. Benito y yo ofrecímonos a facer una xunta esti mes cuando fuere preciso pa tratar cualquier cuestión na que'l Conseyu pudiere tener dalgo que dicir, pero los demás nun lo vieron oportuno y quixeron más facer vacaciones. Dependiendo de cómo salgan les coses de setiembre en p'alantre, y si sigo observando esti tipu de conductes plantegareme la continuidá nel Conseyu o presentaré la dimisión.