El PP presenta la so llista electoral por Xixón

La candidatura del PP al conceyu de Xixón va presentase esti vienres de tarde con Pilar Fernández Pardo como aspirante a l'alcaldía del primer conceyu d'Asturies. La llista inclúi nos sos primeros puestos a Eduardo Junquera, Luis Crego, Manuel Pecharromán, Dorinda García o l'arquitectu Pablo Fernández, que va en categoría d'independiente. El conocíu escritor y militante asturianista Humberto González va figurar nel puestu 16 de la llista, un llugar que lu asitia teóricamente fuera de los puestos de salida, en cuantes que'l PP cuenta actualmente con 11 conceyales por Xixón, conceyu onde la mayoría absoluta asítiase nos 14 conceyales. Humberto González, que se perfilaba como l'apueste asturianista del PP xixonés, queda nun segundu planu electoral, anque l'escritor va siguir como representante de los populares na Fundación Municipal de Cultura de Xixón y va facese cargu d'una mayor responsabilidá nel esquema organizativu del partíu.

La batalla pola alcaldía de Xixón, onde'l PSOE gobierna dende la primer llexislatura democrática ininterrumpidamente, apaez como una de les que van tener un papel más importante a la hora d'esclariar el futuru del mapa políticu asturianu tres del 27 de mayu. Un bon resultáu de los populares xixoneses, anque nun-yos diere l'alcaldía, podría aumentar les opciones de la so llista autonómica qu'encabeza Ovidio Sánchez.