El PP prepara la so entrada nel Conseyu d’Alministración de la TV autonómica

El diputáu del PP Fernando Goñi dixo ayeri na Xunta Xeneral que'l so partíu políticu ta plantegándose la entrada en Conseyu d'Alministración de la Radio Televisión del Principáu d'Asturies en casu de que'l Gobiernu asturianu y el mesmu ente anecien na so conducta de nun da-yos a los populares cuenta de los gastos de la RTPA. Acabaríase asina'l boicot históricu del PP a la TV autonómica.

Pa qu'ello fuere asina, el PP presentó ayeri una Proposición de llei pa que se remocique la Llei del Ente Públicu de Comunicación permitiendo asina a esta fuerza política contar colos seyes representantes en conseyu d'alministración a los qu'arrenegare de mano. El diputáu del PP sorrayó que la entrada del so partíu en Conseyu d'alministración nun vien de motu propio y que se vieren forzaos a ello pola falta d'información sistemática sobre'l funcionamientu y gastos del Ente de comunicación en que taben, y qu'ello nun quier dicir qu'agora'l PP tea d'alcuerdu cola creación de la RTPA. El diputáu popular llamó l'atención sobre'l retrasu que lleva l'alxudicacion de les llicencies de TV Dixital autonómiques y locales y dixo que cuidaba qu'ello "nun tendría que ver cola competencia qu'esta ufierta dixital y pudiere facer al Ente Públicu de Comunicación"

La entrada del PP nel Conseyu d'Alministración de la RTPA supón ún pasu grande na normalización política del énte, siendo la Conseyera de Cultura y portavoz del Gobiernu Ana Rosa Migoya la primera en congraciáse por ello, anque refugando los motivos daos pol PP pa entrar en conseyu d'Alministración, pero ello ye que más xente n'otres trincheres polítiques esperaba qu'asocediere esto, como ye'l casu d'Adolfo Camilo Díaz, representante d'IX-BA nel Conseyu de la RTPA y que yá comentare a Asturies.com nel mes d'agostu que vía precisa la entrada de los populares a los órganos de gobiernu de la RTPA pa normalizar el debate y evitar qu'una fuerza pudiere aplicar el rodiellu nel Conseyu d'Alministración. Agora qu'esto ta pa producise, Adolfo Camilo Díaz declaró a Asturies.com que s'allegraba de que "El PP, qu'hasta agora facia una suerte d'insumisión qu'en poco contribuyía al consensu, entre al Ente". "Por mi bienveníos" comentó l'escritor ayeranu, que camienta que la entrada del PP va dar "una mayor pluralidá y ún debate mas arriquecedor nun momentu en que tan faciéndose les bases temátiques de la programación de la TV". Adolfo Camilo, que tien una de les sos prioridaes personales dientro de la RTPA en "asegurar con criterios de calidá oxetivaos una presencia digna del asturianu" la presencia del PP "qu'a lo llargo d'estos meses enseño la so vertiente mas sensible pa cola llingua ha confirmase en dalgo real" polo qu'espera "que'l PP traduza en fechos lo que plantegó nos últimos meses". Con too y con ello, Camilo ye cautu y amiesta que "nun se pue aventurar lo que vaya asoceder, y en cualquier casu hai que ser conscientes de que los qu'apostamos por una tv na que l'asturianu tenga la presencia que merez somos conscientes de les terribles contradicciones en que se mueven PSOE y PP y a les que-yos lleva la so propia dinámica, unes contradicciones que se resuelven davezu faciendo de menos a la parte más feble, una práctica que suel ser mortífera pal asturianu anque dempués lu defendan con bones pallabres".