El PP pide la dimisión de la presidenta de la Xunta Xeneral

El Partíu Popular desixó ayer la "inmediata dimisión" de la presidenta de la Xunta Xeneral del Principáu, María Jesús Álvarez, depués de conocese una sentencia del Tribunal Superior de Xusticia d'Asturies qu'anula la convocatoria de la plaza d'interventor del parlamentu asturianu.

El diputáu popular Fernando Goñi señaló en rueda de prensa que'l procesu de selección pa la plaza d'interventor consistió en "cómo dar una plaza a una persona en concreto" más que buscar un "perfil", ya que "solo" ún de los aspirantes reunía tolos requisitos de les bases de la convocatoria. Según el PP esta convocatoria, que data del 2002, foi aprobada por Maria Jesús Álvarez "en contra d'un informe del director d'Asuntos Alministrativos", razón pola que'l Partíu Popular decidió acudir a la xusticia.

Finalmente ayer la sala contencioso-alministrativa del TSXA dictaminó la nulidá del procesu selectivu. El propiu diputáu popular fexo referencia a delles de les razones del tribunal pa sofitar esta decisión, ente les que destacó que'l procesu foi "frutu del decisionismu políticu" y burló'l "conteníu mínimu y irrenunciable de la Llei de Función Pública" al nun tener nin "un trabayu de campu previu nin informes de los que se deduza una valoración que de soporte a la decisión adoptada".