El PP de Xixón condena les declaraciones de Sanjurjo

Les declaraciones del alcalde en funciones de Xixón Pedro Sanjurjo nes que dicía que la conceyala popular Pilar Fernández Pardo nun yera la persona más indicada pa opinar sobre temes de llingua asturiana pol fechu de qu'ella nun ye natural d'Asturies siguen dando cuerda na vida política de Xixón. Si'l llunes yera'l Círculu de Pensamientu Lliberal, grupu de pensamientu integráu mayormente por militantes del PP, el que protestaba poles declaraciones del alcalde en funciones de Xixón, ayeri foi'l mesmu grupu'l que censuró al socialista Sanjurjo al traviés de la persona del conceyal Luis Crego.

Según el conceyal popular les opiniones de Sanjurjo sedríen un "insultu a la intelixencia de nun ser porque vienen d'una persona que, como Pedro Sanjurjo, ya nos tien avezaos a nun gastar muncha intelixencia". Pa Luis Crego "Sorprende que los non nacíos equí nun puedan manifestase con conocimientu bastante, según el vicealcalde Sanjurjo, sobre la historia, la cultura o la llingua de Xixón o d'Asturies". El comunicáu del PP de Xixón remata diciendo que l'agrupación "refuga declaraciones como esta qu'enxerten conceptos xenófobos y escluyentes na nuestra convivencia, hasta agora felizmente ausentes nuna sociedá como l'asturiana".