El PP de L.lena llama terroristes a PSOE, IX y URAS pol reglamentu d’usu del asturianu

El plenu del Ayuntamientu de L.lena d'esti llunes acabó con una engarrada verbal ente'l vocal del PP y tolos demás grupos representaos nel conceyu, a los que llamó "terroristes". El motivu, la presentación en plenu del reglamentu d'usu del asturianu nel conceyu, un documentu que s'aprebare por unanimidá en Comisión de Cultura y que se contaba con que pasare pel plenu col mesmu consensu. Sicasí, cuando-y tocó'l turnu de pallabra a Victorino Fernández,el representante del PP, la tranquilidá tornó n'escándalu. El vocal de los populares l.lenizos dixo que'l reglamentu que se ponía a votación yera propiu de nacionalistes estremaos y que paecía inspiráu pola banda terrorista ETA, acusando de terroristes a tolos partíos que diben votar al favor d'aquel documentu. Les intervenciones del alcalde Hugo Alfonso Morán mandando callar al conceyal del PP y esixendo-y que retirare la ofiensa nun ficieron munchu efectu nes files populares, en cuantes que naide del grupu popular nun s'echó p'atrás de lo que dixo'l vocal, que tuvo que retirar, eso si, l'acusación de terroristes que-yos echare en plenu a PSOE, IX y URAS.

Dos díes dempués del polémicu plenu, nel qu'al final acabaron por aprebase les ordenances colos votos al favor de tolos grupos menos el PP, l'asuntu resquema, y muncho, na casa conceyu de L.lena. La conceyala de cultura, turismu, mocedá y muyer, Paz García, declaró esta mañana que se sentía engañada y traicionada pol PP nesti asuntu y llamentó que'l PP garrare formes y actitúes propies de va cuarenta años pa un tema que llegaba al plenu col preste unánime de tolos partíos na comisión de cultura, qu'aceptó toles enmiendes que quixo poner el PP sobre'l testu orixinal.

La conceyala esplicó a Asturies.com que'l conceyu de L.lena lleva yá ocho años faciendo una política propia de promoción del asturianu que nunca nun tuvo la oposición de naide, nin dientro nin fuera de la Casa Conceyu. Dientro d'esta política, el gobiernu municipal plantegárase que les ordenances teníen de ser un elementu de consensu, y por ello decidió facer un procesu lo más abiertu posible nel que tolos grupos participaren de la ellaboración d'un reglamentu d'usu que dempués complementaríen unes ordenances.

Nesti sentíu, en febreru del 2.003 entamó'l llabor pa llegar un añu dempués al documentu final, al que namás los conceyales del PP punxeron enmiendes. En concreto, les pegues de los populares al documentu yeren sobre la traducción d'actes y espedientes municipales y sobre la necesidá de que les comunicaciones esteriores del Ayuntamientu fueren n'asturianu. La Comisión de Cultura decidió aceptales toes col envís de que'l documentu s'aprebare por unanimidá y poder asina sacar el debate sobre l'asturianu de la dinámica de llucha de partíos. La salida del PP el llunes franció esi consensu y amosó una contradicción interna nel partíu, qu'hasta agora nun se punxere en contra del reglamentu. La conceyala de cultura rellacionó lo del llunes, que calificó de "traición" cola cercanía de les elecciones y llamentó que l'ataque viniere d'una persona, Victorino Fernández, que dixo que taba "sensibilizada" a favor de la cuestión.